გასულ კვირაში საქართველოს ეკონომიკაში ზრდის რამდენიმე მნიშვნელოვანი სიგნალი გამოიკვეთა - ტურიზმში, საგარეო ვაჭრობასა და ფინანსურ ბაზრებზე. გალტ & თაგარტის კვირის მიმოხილვა ასახავს, როგორ შეიცვალა ძირითადი ტენდენციები წლის ბოლოსკენ.ტურიზმის შემოსავლები: ზრდა მოლოდინს აღემატება2025 წლის მე-4 კვარტალში ტურიზმიდან მიღებული შემოსავლები წლიურად 9.2%-ით გაიზარდა და 1.1 მლრდ აშშ დოლარი შეადგინა. ჯამურად, ტურიზმის შემოსავლები 4.7 მლრდ აშშ დოლარს გაუტოლდა 2025 წელს, რაც მცირედით აღემატება გალტ & თაგარტის პროგნოზს. 2026 წელს, გალტ & თაგარტი ტურიზმის შემოსავლების 5.0 მლრდ აშშ დოლარამდე ზრდას პროგნოზირებს.საგარეო ვაჭრობა: ექსპორტი და იმპორტი რეკორდულ ნიშნულზეა2025 წლის დეკემბერში საქონლის ექსპორტი წლიურად 22.5%-ით გაიზარდა და 673.2 მლნ აშშ დოლარი შეადგინა, რაც ძირითადად ადგილობრივი ექსპორტის ზრდამ განაპირობა.  საქონლის იმპორტი წლიურად 8.5%-ით გაიზარდა 1.8 მლრდ აშშ დოლარამდე, რაც ძირითადად კაპიტალური საქონლის, საწვავის, სამრეწველო და საკვები პროდუქტების იმპორტის ზრდამ განაპირობა. საერთო ჯამში, 2025 წელს საქონლის ექსპორტი 7.3 მლრდ აშშ დოლარი, ხოლო იმპორტი 18.5 მლრდ აშშ დოლარი იყო - ორივე მაჩვენებელი ისტორიულ მაქსიმუმზეა.ფულადი ბაზარი: მაღალი მოთხოვნა ნარჩუნდება 20 იანვარს ფინანსთა სამინისტრომ სახაზინო ფასიანი ქაღალდების 1 აუქციონი ჩაატარა. მაღალი ინტერესის ფონზე მოთხოვნამ შეთავაზებას მნიშვნელოვნად გადააჭარბა და საშუალო შეწონილი საპროცენტო განაკვეთი შემცირდა. 

აზიის განვითარების ბანკმა (ADB) 270 მილიონი ლარის (დაახლოებით 100 მილიონი აშშ დოლარის) სესხი დაუმტკიცა სს თიბისი ბანკს (თიბისი ბანკი), საქართველოში მიკრო, მცირე და საშუალო მეწარმეებისთვის (MSME) ხელმისაწვდომი დაფინანსების გასაფართოებლად.სესხის 70%-მდე წილი მიმართული იქნება მიკრო, მცირე და საშუალო მეწარმეების დაფინანსებაზე, საიდანაც მინიმუმ 20% მოხმარდება ქალების მფლობელობაში არსებულ ან ქალების ხელმძღვანელობით მოქმედ საწარმოებს, ხოლო მინიმუმ 30%-ით დაფინანსდება მწვანე ინვესტიციები საქართველოს ეროვნული ბანკის მწვანე ტაქსონომიის შესაბამისად.„კერძო სექტორის გაძლიერება ADB-ის ერთ-ერთი მთავარი პრიორიტეტია, განსაკუთრებით, მიკრო, მცირე და საშუალო საწარმოების, რომლებიც საქართველოს ეკონომიკის საყრდენს წარმოადგენენ, და მზად ვართ, ხელი შევუწყოთ მათ ზრდას, განვითარებასა და ფინანსებზე წვდომის გაუმჯობესებას,” განაცხადა ADB-ის მუდმივი წარმომადგენლობის დირექტორმა საქართველოში ლესლი ბეარმან ლამმა. „თიბისი ბანკი ჩვენი ხანგრძლივი პარტნიორია და ვიმედოვნებთ, რომ ახალი თანამშრომლობა საქართველოში გრძელვადიან, მდგრად და ინკლუზიურ ეკონომიკურ ზრდას უზრუნველყოფს“.ეს თანამშრომლობა მეწარმეებს უზრუნველყოფს სტაბილური, ხელმისაწვდომი და გრძელვადიანი დაფინანსებით, რაც ხელს შეუწყობს ბიზნესის განვითარებასა და ახალი სამუშაო ადგილების შექმნას. ასევე გაიზრდება მწვანე დაფინანსების გადაწყვეტილებებზე წვდომა, რაც დაეხმარება ბიზნესებს ეკომეგობრული და მდგრადი პრაქტიკების დანერგვაში და ამინდის ზემოქმედების მიმართ მედეგობის გაძლიერებაში. პროექტის მიზანია წვლილი შეიტანოს საქართველოს ამოცანის განხორციელებაში, რაც 2030 წლისთვის სათბურის აირების ემისიების 1990 წლის დონესთან შედარებით 35%-ით შემცირებას ითვალისწინებს. პროექტი ასევე მიმართულია მეწარმეების შესაძლებლობების გაძლიერებისკენ, რათა მათ კიდევ უფრო დიდი წვლილი შეიტანონ საქართველოს ეკონომიკაში.ADB დამატებით გამოყოფს 250,000 აშშ დოლარის ტექნიკურ დახმარებას თიბისი ბანკისთვის. ფინანსური რესურსი მოხმარდება ბანკის მწვანე დაფინანსების შესაძლებლობების გაძლიერებასა და კლიენტების სათბურის აირების ზემოქმედების შეფასებისა და ანგარიშგების ინსტრუმენტების გაუმჯობესებას.„ვაფასებთ ADB-სთან ჩვენს მრავალწლიან პარტნიორობას და მათ უწყვეტ მხარდაჭერას. აღნიშნული ტრანზაქცია კიდევ უფრო გააძლიერებს ჩვენს თანამშრომლობას და შესაძლებლობას მოგვცემს, მიკრო, მცირე და საშუალო საწარმოებისათვის გრძელვადიანი ფინანსური რესურსის ხელმისაწვდომობა გავზარდოთ,” განაცხადა თიბისი ბანკის გენერალურმა დირექტორმა ვახტანგ ბუცხიკიძემ. “MSME სექტორის, ქალი მეწარმეებისა და მწვანე ინვესტიციების მხარდაჭერა სრულად შეესაბამება ჩვენს სტრატეგიას და მნიშვნელოვან წვლილს შეიტანს ქვეყნის ეკონომიკურ განვითარებაში”.პროექტი გააძლიერებს რეგიონებზე წვდომას თიბისი ბანკის ფართო ქსელის საშუალებით, რაც ხელს შეუწყობს საწარმოების განვითარებას, ადგილობრივი შემოსავლების გაზრდასა და ახალი სამუშაო ადგილების შექმნას. ეს მიდგომა შეესაბამება ADB-ის საქართველოსთან თანამშრომლობის 2024–2028 წლების სტრატეგიას, რომელიც მიმართულია კერძო სექტორის ინვესტიციების დაფინანსებაზე, მცირე ბიზნესის განვითარებასა და გარემოს მიმართ მდგრადი პრაქტიკების დანერგვის მხარდაჭერაზე.თიბისი ბანკი არის ფინანსური სერვისების წამყვანი ჯგუფი საქართველოში, რომელიც ოპერირებს საცალო, კორპორაციული და MSME სეგმენტებში. 2025 წლის 30 სექტემბრის მდგომარეობით, საქართველოს ეროვნული ბანკის მონაცემებზე დაყრდნობით თიბისი ბანკის ბაზრის წილი მთლიან სესხებში შეადგენდა 37.2%-ს, ხოლო მთლიან დეპოზიტებში 37.2%-ს. თიბისი ბანკის მფლობელია TBC Bank Group PLC (TBC PLC), რომლის აქციებიც ლონდონის საფონდო ბირჟაზე ირიცხება ტიკერით TBCG და FTSE 250 ინდექსის შემადგენელია. TBC PLC ასევე არის FTSE4Good ინდექსის სერიისა და MSCI United Kingdom Small Cap ინდექსის წევრი.ADB საქართველოს მხარდამჭერია 2007 წლიდან და ქვეყნის განვითარების ერთ-ერთი უდიდესი მულტილატერალური პარტნიორია. ADB-ის საქართველოსთვის გაღებული აქვს $5 მილიარდის ღირებულების სესხი, გრანტი და ტექნიკური დახმარება, საიდანაც დაახლოებით $1 მილიარდი კერძო სექტორის პროექტებზე მოდის. ADB-ის საქართველოსთან თანამშრომლობის ხუთწლიანი სტრატეგია მიზნად ისახავს ქვეყანას დაეხმაროს მწვანე და ინკლუზიურ რეგიონულ კარიბჭედ განვითარებაში, ხელი შეუწყოს სახელმწიფო და კერძო სექტორში ინვესტიციების განხორციელებას, რეფორმებს, ცოდნის გაღმავებას, კლიმატგამძლე ინფრასტრუქტურის შენებასა და რეგიონულ ინტეგრაციას.ADB მრავალმხრივი განვითარების წამყვანი ბანკია, რომელიც მხარს უჭერს ინკლუზიურ, მედეგ და მდგრად ეკონომიკურ ზრდას აზიისა და წყნარი ოკეანის რეგიონში. მუშაობს რა, წევრ ქვეყნებთან და პარტნიორებთან ერთად კომპლექსური გამოწვევების დასაძლევად, ADB ეყრდნობა ინოვაციურ ფინანსურ ინსტრუმენტებს და სტრატეგიულ თანამშრომლობას, რათა გარდაქმნას ადამიანების ცხოვრება, შექმნას ხარისხიანი ინფრასტრუქტურა და დაიცვას ჩვენი პლანეტა. 1966 წელს დაარსებული ორგანიზაციის მფლობელია 69 წევრი ქვეყანა, მათ შორის 50 რეგიონიდანაა წარმოდგენილი.

საერთაშორისო გამოცემა Global Finance-მა მდგრადი დაფინანსების მიმართულებით 2026 წლის საუკეთესო ფინანსური ინსტიტუტები გამოავლინა 56 ქვეყნისა და ტერიტორიული ერთეულის მასშტაბით.გამოცემამ საქართველოს ბანკი 2026 წლის საუკეთესოდ ბანკად დაასახელა საქართველოში მდგრადი დაფინანსების მიმართულებით.  როგორც Global Finance-ის რედაქცია აღნიშნავს, ჯილდოს მიზანი ისეთი გლობალური, რეგიონული და ადგილობრივი ფინანსური ლიდერების გამოვლენა და აღიარებაა, რომლებსაც მნიშვნელოვანი წვლილი შეაქვთ მდგრადი მომავლის შექმნის პროცესში.ინფორმაციისთვის, მდგრადი დაფინანსება მიმართულია განახლებადი ენერგიის, ენერგოეფექტური მშენებლობების, ჯანდაცვის, განათლების და სხვა, დადებითი გარემოსდაცვითი და სოციალური გავლენის სექტორებისკენ/საქმიანობებისკენ.„მდგრადი დაფინანსების მნიშვნელობა მსოფლიოს წამყვან ბაზრებზე სულ უფრო და უფრო იზრდება, რასაც ხელს უწყობს მდგრადი დაფინანსების მოცულობის ზრდა. შესაბამისად, Global Finance-ის მდგრადი დაფინანსების ჯილდო იმ ფინანსური ინსტიტუტების აღიარებასა და გამოვლენას ემსახურება, რომლებიც ქმნიან სხვადასხვა კრეატიულ, ინოვაციურ გადაწყვეტებს და სექტორში მწვანე დაფინანსების მიმართულებით ლიდერის პოზიციებს იკავებენ“, - აღნიშნავს ჯოზეფ ჯიარაპუტომ, Global Finance-ის დამფუძნებელი და სარედაქციო დირექტორი."Global Finance-ის მიერ საქართველოს ბანკისთვის მონიჭებული ჯილდო - “2026 წლის საუკეთესო ბანკი საქართველოში მდგრადი დაფინანსების მიმართულებით” - ჩვენი გრძელვადიანი სტრატეგიისა და სისტემური მუშაობის მნიშვნელოვანი აღიარებაა. ჩვენთვის მდგრადობა არ არის ცალკეული ინიციატივა - ის ინტეგრირებულია ჩვენს ბიზნეს მოდელში, რისკების მართვაში და პროდუქტების განვითარებაში. ვმუშაობთ მწვანე და კლიმატზე ორიენტირებული დაფინანსების გაფართოებაზე, ESG შეფასებების გაძლიერებაზე და ისეთი ფინანსური გადაწყვეტილებების შექმნაზე, რომლებიც ერთდროულად ქმნის ეკონომიკურ ღირებულებას და პოზიტიურ გარემოსდაცვით და სოციალურ გავლენას. ჩვენი წარმატება და Global Finance-ის მიერ მონიჭებული აღიარება საქართველოს ბანკის 9000-ზე მეტი თანამშრომლის ძალისხმევის შედეგია. ეს ჯილდო გვაძლევს დამატებით მოტივაციას, გავაგრძელოთ ლიდერობა საქართველოს ფინანსურ სექტორში მდგრადი განვითარების მიმართულებით”, - აღნიშნავს ანა ოსაძე, საქართველოს ბანკის ESG და მდგრადობის მიმართულების ხელმძღვანელი.ინფორმაციისთვის, მდგრადი დაფინანსების ჯილდოს ფარგლებში გამარჯვებულების შერჩევა დამოუკიდებელი მკვლევრებისა და სარედაქციო ჯგუფის მიერ ორგანიზაციების მხრიდან წარმოდგენილ მონაცემებზე დაყრდნობით განხორციელდა. შეფასების კრიტერიუმები მოიცავდა როგორც მმართველობით პოლიტიკასა და მიზნებს, ასევე მიღწევებს გარემოსდაცვითი და სოციალური მდგრადი დაფინანსების მიმართულებით.Global Finance-ის აღნიშნული ჯილდო მოიპოვეს ისეთმა ფინანსურმა ინსტიტუტებმა, როგორებიც არის: Ameriabank (სომხეთი), Deutsche Bank (გერმანია), Societe Generale (საფრანგეთი), HSBC (დიდი ბრიტანეთი) და სხვა. 

"არ შევეხებით არავითარ შემთხვევაში ბიზნესის თავისუფლებას, მაგრამ, ამასთან ერთად, ბიზნესთან ერთად გვინდა ვიზრუნოთ ფასების შემცირებაზე", - ამის შესახებ პრემიერ-მინისტრმა ირაკლი კობახიძემ „იმედის კვირის“ ეთერში განაცხადა და დაამატა, რომ საკითხი საკმაოდ რთულია.ის ხაზს უსვამს, რომ ბიზნესი თავისუფალია და უნდა იყოს თავისუფალი.„საქმე ეხება ბიზნესს. რა თქმა უნდა, ბიზნესი თავისუფალია და უნდა იყოს თავისუფალი. ნებისმიერი ბიზნესი ბუნებრივად არის ორიენტირებული მაქსიმალური მოგების მიღებისკენ, მაგრამ აქ შემოდის სოციალური ელემენტი, რაც განსაკუთრებით აქტუალურია, ბუნებრივია, პროდუქციის რეალიზების შემთხვევაში. ჩვენ, როგორც ხელისუფლებას გვაქვს განსაკუთრებული სოციალური პასუხისმგებლობა, რომ ბიზნესის თავისუფლებასთან ერთად, ვიზრუნოთ ამ სოციალური საკითხის მაქსიმალურად მოგვარებაზე. ეს გვესახება ბიზნესთან თანამშრომლობის საფუძველზე. გვაქვს ჩვენი ხელწერა, ჩვენი მუშაობის სტილი, მათ შორის, ბიზნესის თავისუფლება არის ერთ-ერთი უმთავრესი მონაპოვარი, რომლითაც ვამაყობთ 2012 წლის შემდეგ. აქედან გამომდინარე, ბუნებრივია, არ შევეხებით არავითარ შემთხვევაში ბიზნესის თავისუფლებას, მაგრამ, ამასთან ერთად, ბიზნესთან ერთად გვინდა ვიზრუნოთ ფასების შემცირებაზე“, - განაცხადა კობახიძემ.

 23 იანვარს ქუთაისში უნალექო ამინდს ელოდებიან, დღისით +11 და ღამით +5 გრადუსია მოსალოდნელი.წვიმიანი ამინდია ოზურგეთში. დღისით +10 გრადუსი დაფიქსირდება, ღამით კი +5 გრადუსი იქნება. ბათუმში დღისით ჰაერი +10 გრადუსამდე გათბება, ხოლო ღამით +5 გრადუსი დაფიქსირდება. იწვიმებს.უნალექო ამინდია ფოთში. დღისით +10 გრადუსი დაფიქსირდება, ღამით კი +6 გრადუსია მოსალოდნელი. ნალექი არც ზუგდიდში იქნება, დღისით ტემპერატურა +10, ღამით კი +4 გრადუსია ნავარაუდევი.სოხუმშიც უნალექო ამინდია. +11 გრადუსია მოსალოდნელი დღისით, ღამით +5 გრადუსი დაფიქსირდება.მესტიაში თოვლია მოსალოდნელი, დღისით +2 გრადუსი იქნება, ღამით კი -8 გრადუსი დაფიქსირდება. ამბროლაურშიც თოვლიანი ამინდია, ჰაერი +5 გრადუსამდე გათბება, ღამით კი -4 გრადუსი დაფიქსირდება.ასეთივე ამინდია ჭიათურაში, დღისით +6 გრადუსი, ღამით კი -3 გრადუსი დაფიქსირდება. ახალციხეში დღისით +1 გრადუსი, ღამით კი -8 გრადუსი იქნება.ახალქალაქში მოსალოდნელია თოვლი. დღისით +1, ღამით -8 დაფიქსირდება.ბორჯომშიც თოვლოს ვარაუდობენ. +4 იქნება დღისით, ღამით კი -6 გრადუსი დაფიქსირდება. უნალექო დღეა მოსალოდნელი ბაკურიანში, დღისით -1 გრადუსია მოსალოდნელი, ღამით -13 გრადუსი დაფიქსირდება.უნალექო დღეს ელოდებიან გორში, დღისით +5 გრადუსი, ღამის განმავლობაში კი -5 გრადუსი დაფიქსირდება. ცხინვალში ჰაერის ტემპერატურა 4 გრადუსი იქნება, ღამით კი -6 გრადუსი დაფიქსირდება.გუდაურში უნალექო ამინდია მოსალოდნელი, დღის განმავლობაში -4 გრადუსი დაფიქსირდება, ღამით კი ჰაერის ტემპერატურა -12 გრადუსი იქნება. ომალოშიც უნალექო ამინდია, -2, ღამით კი -12 გრადუსი დაფიქსირდება.ლაგოდეხში უნალექო დღეს ელოდებიან. ჰაერის ტემპერატურა დღის განმავლობაში +5 გრადუსი იქნება, ღამით კი -2 გრადუსი დაფიქსირდება. უნალექო დღე იქნება თელავში, +5 გრადუსი დაფიქსირდება, ღამით კი -5 გრადუსია ნავარაუდევი.ნალექი არც გურჯაანში იქნება. დღისით +6 გრადუსი, ღამით კი -3 გრადუსი დაფიქსირდება. სიღნაღში უნალექო დღეა მოსალოდნელი, დღისით 6 გრადუსია მოსალოდნელი, ღამით -2 გრადუსი დაფიქსირდება.რუსთავში ნალექს ელოდებოან თოვლის სახით. დღისით +5 გრადუსია მოსალოდნელი, ღამით კი -1 გრადუსი დაფიქსირდება.თბილისში ხანმოკლე თოვლს პროგნოზირებენ. ჰაერის ტემპერატურა დღისით +5 გრადუსს მიაღწევს, ღამით კი -1 გრადუსი იქნება. 

საქართველოს ბანკი  პროფესიული განვითარების შესაძლებლობების შექმნას აგრძელებს. სტუდენტური დასაქმების პროგრამა „ლიდერატორი“ უკვე მეათე წელია მე-3, მე-4 კურსის სტუდენტებსა და ახალ კურსდამთავრებულებს შესაძლებლობას აძლევს, რეალურ სამუშაო გარემოში პირველი პროფესიული ნაბიჯები გადადგან.ლიდერატორის პროგრამაში მონაწილეობის მიღება 20 იანვარს დაიწყო და 3 თებერვალს დასრულდება. დაინტერესებულ პირებს შეუძლიათ პროგრამებს გაეცნონ და განაცხადი გააგზავნონ აქ.პროგრამა 8 თვე გრძელდება და მოიცავს ინტენსიურ ტრენინგებს, მენტორობას, რეალურ პროექტებზე მუშაობას და როტაციულ სამუშაო გამოცდილებას დაკავშირებულ დეპარტამენტებში. ლიდერატორებს შესაძლებლობა აქვთ, საკუთარი თვალით ნახონ, თუ როგორ მუშაობს ბანკის სტრუქტურა და როგორ იქმნება პროდუქტები, რომლებიც მილიონზე მეტი მომხმარებლის ყოველდღიურობას ამარტივებს.აღსანიშნავია, რომ 2017 წლიდან ლიდერატორის პროგრამაში მონაწილეობა 500-მდე ახალგაზრდამ მიიღო,  რომელთა 78%-მა კარიერული განვითარება საქართველოს ბანკში განაგრძო.ინფორმაციისთვის, სტაჟირების პროგრამაში მონაწილეობისთვის, ახალგაზრდები უნდა იყვნენ III-IV კურსის სტუდენტები ან 1-2 წლის კურსდამთავრებულები.2026 წლისთვის მიღება გამოცხადებულია შემდეგ პროგრამებზე: კორპორაციული და საინვესტიციო ბანკინგი; პრემიუმ ბანკინგი და საბროკერო საქმე; სტრატეგიული ფინანსები და ბიზნეს ეფექტურობა; საოპერაციო რისკები, აუდიტი და შიდა კონტროლი; მომხმარებლებთან ურთიერთობის, გამოცდილებისა და ლოალურობის მართვა; საბანკო სამართალი; ბიზნესის ანალიტიკა და რეპორტინგი; მონაცემთა მეცნიერება; IOS დეველოპმენტი; მარკეტინგი; ტალანტების მოზიდვა და განვითარება. ოპერაციების ანალიზი და პორტფელური რისკების მართვა პროგრამაში მონაწილეობის შესახებ დეტალური ინფორმაციის მისაღებად შეგიძლიათ ეწვიოთ ვებგვერდს: leaderator.bog.ge

ელიავას მიმდებარე ტერიტორიაზე მეორადი საბურავების რეალიზატორების აქცია მიმდინარეობს. ისინი 1-ელი იანვრიდან ამოქმედებულ რეგულაციას აპროტესტებენ, რომლის მიხედვითაც, მეორეული საბურავების, შავი და ფერადი ლითონების ჯართის, ექსპლუატაციიდან გამოსული სატრანსპორტო საშუალებებისა და მათი ნაწილების, ადვილად აალებადი, ფეთქებადი ან ამტვერებადი მასალის განთავსება ან/და რეალიზაცია თბილისის სხვადასხვა ზონაში აიკრძალა. კანონის დარღვევა კი 2500 ლარიდან 30 000 ლარამდე ჯარიმას გულისხმობს.აგლაძის ქუჩაზე მდებარე მაღაზიების წარმომადგენლები ამბობენ, რომ ისინი იძულებულები არიან ობიექტები დახურონ და შემოსავლის გარეშე დარჩნენ.საბურავების რეალიზატორები ითხოვენ, მთავრობამ გონივრული ვადა ან ალტერნატიული ფართები გამოუყოს, სადაც საქმიანობის გაგრძელებას შეძლებენ.„მე პირადად ბანკის ვალი მაქვს და ჩემნაირი არის აქ 80%. კარგია, დაკეტე, რით ვიხადოთ ეს ბანკის ვალი?! შემოსავლების სამსახური შემომივიდა და მე პირადად პროცენტულად დამითვალა 195% მოგება, რომელიც არარეალურია და დამადო 600 000 ლარის ჯარიმა, რომელსაც ჯიშ-ჯილაგი რომ ამოვყიდო, ვერ გადავიხდი. შანსი არ არის. ამდენი ვალდებულების მერე, რომ მეუბნები, დაკეტე, სად წავიდე, რა ქნას ამ ხალხმა?! მე სტუდენტი მყავს, პატარა მყავს, ოჯახს ვარჩენ ამით, მეტი შემოსავალი არაფერი არ გვაქვს“,- განაცხადა აქციის მონაწილემ ტელეკომპანია „პირველთან“.„რაც შემოტანილი გვაქვს, ეგ საქონელი ხომ უნდა გავყიდოთ?! საგადასახადო ვალდებულებები გვაქვს, საბანკო ვალდებულებები გვაქვს და გვეუბნებიან წადით სახლში, არ გვაინტერესებს. ვიყავით ჩვენ მერიაშიც მისულები, არანაირი პირობები, ჩვენ არ გვაქვს, არც ადგილებიო, სად უნდა გადაგიყვანოთო, არაფერი არ შენდებაო, ასე მითხრეს. ჩვენ ვითხოვთ სამუშაოს და ამათ არაფერი არ აინტერესებთ. ეგრე არ არის, ხალხი თუ არ დაუდგება ქვეყანას გვერდში და ისინი თუ არ დაგვიდგებიან, არაფერი არ გამოვა“, - ამბობს კიდევ ერთი მაღაზიის მფლობელი.„პირველი რაც მგონია, არის იმის ინტერესი, რომ თუ ახალი საბურავი შეიძლება, ესე იგი, არის კონკრეტული კომპანიების ინტერესი... სადაც ეტყობა, სახელმწიფო ზის და მაგათ დაქვემდებარებაშია. აბა როგორ შეიძლება მეორადი იყოს აალებადი და ახალი არ იყოს აალებადი?! მე სამი შვილი მყავს, მეუღლე მყავს, 4 სული ჩემი სარჩენია. მოგვცენ ალტერნატიული ფართი, ან დრო მისცენ მეპატრონეებს. ეს არ არის ერთ დღეში გადასატანი თემა.„თუნდაც ის ერთი 6 თვე გადაგვივადონ. 6 თვეში ჩვენ ყველაფერს იმ დონეზე მოვაწესრიგებთ აქ, შეიძლება თვითონაც არ ელოდონ ისეთ სისუფთავეს. ერთ კვირაში მოდი წაიღე.. ჯერ ამდენი საბურავი სად უნდა წავიღოთ?! ეს ხომ უნდა გაითვალისწინონ, სადღაც ადგილი ხომ გვინდა. ისეთ ფასები აქვს დღეს მიწას, ვერცერთი ჩვენგანი ვერ შეძლებს მაგის ყიდვას“,- ამბობენ საბურავების რეალიზატორები ტელეკომპანია „პირველთან“.შეგახსენებთ, რომ მეორეული საბურავების, შავი და ფერადი ლითონების ჯართის, ექსპლუატაციიდან გამოსული სატრანსპორტო საშუალებებისა და მათი ნაწილების, ადვილად აალებადი, ფეთქებადი ან ამტვერებადი მასალის განთავსება ან/და რეალიზაციის სრულად აკრძალვა ეხება დედაქალაქის მასშტაბით არსებულ საცხოვრებელ, რეკრეაციულ, სატყეო, სპეციალურ, სატრანსპორტო და სანიტარული დაცვის ზონებს. ხოლო დასაშვებ ფუნქციურ ზონებში (ძირითადად სამრეწველო და საზოგადოებრივ-საქმიანი ზონა), განისაზღვრა გარკვეული პირობები, რომლებიც ტერიტორიის მესაკუთრეებმა და მეწარმე სუბიექტებმა უნდა დააკმაყოფილონ.

საქართველოში შიდა ფრენებს AK-Air Georgia ახორციელებს. აღნიშნულ კომპანიას ხელშეკრულება ჯერ კიდევ 2018 წელს 4 წლის ვადით გაუფორმდა, თუმცა მას შემდეგ ხელშეკრულება არაერთხელ გახანგრძლივდა, ბოლო მდგომარეობით კი, AK-Air შიდა ფრენებს 2026 წლის 30 ივნისის ჩათვლით განახორციელებს.შიდა ფრენები საქართველოში ამჟამად რამდენიმე მიმართულებით სრულდება. 2026 წლის იანვარში ფრენები ხორციელდება შემდეგ მიმართულებებზე: ამბროლაური-ნატახტარი, ქუთაისი-მესტია, მესტია-ნატახტარი და ნატახტარი ბათუმი.რა ღირს შიდა ფრენები საქართველოშირაც შეეხება ფასებს, ერთი გზის ფასი 50 ლარიდან იწყება და 125 ლარს აღწევს.უფრო კონკრეტულად, „ბიზნესპრესნიუსი“ გთავაზობთ, რა ღირს ამჟამად შიდა ფრენები ოთხ ძირითად მიმართულებაზე: ამბროლაური-ნატახტარი - 50 ლარი; ქუთაისი-მესტია - 50 ლარი; მესტია-ნატახტარი - 90 ლარი; ნატახტარი-ბათუმი - 125 ლარი.

საქართველოში ოქროს ფასმა ახალ რეკორდულ მაჩვენებელს მიაღწია. 1 გრამი 999-სინჯიანი ძვირფასი ლითონის, ე.წ. „ბაჯაღლოს“ ღირებულებამ 416 ლარი შეადგინა. რაც შეეხება სტანდარტული 750-სინჯიან ოქროს, 1 გრამის ფასი 312 ლარია, ხოლო 858-სინჯიანის - 243 ლარი.გაძვირებულია ვერცხლიც. 999-სინჯიანი 1 გრამის ფასი 8.46 ლარს შეადგენს, ხოლო 800-სინჯიანი - 6 ლარი ღირს.ოქრო ძვირდება მსოფლიოშიც. ამ მომენტისთვის 1 უნციის ფასი 4 706 დოლარს შეადგენს, ხოლო ვერცხლი 93,45 დოლარი ღირს.BBC-ის ვერსიით, ძვირფასი ლითონის ფასის ზრდა აშშ-ის პრეზიდენტის, დონალდ ტრამპის მიერ 8 ევროპული ქვეყნის მიმართ 10%-იანი ტარიფის დაწესება სახელდება, რომლებმაც გრენლანდიის საკითხთან დაკავშირებით თავისი პოზიცია დააფიქსირეს.

საქართველოში საავტომობილო ბაზარზე ახალი ბრენდი შემოვიდა. კომპანია „გეზ მოტორსმა“ წლის ბოლოს რიგით მეორე საავტომობილო ბრენდი - SOUEAST წარადგინა. აღნიშნული ბრენდი იმ მომხმარებლებზეა გათვლილი, ვისთვისაც ავტომობილი ყოველდღიური გადაადგილების სანდო, კომფორტულ და ფუნქციურ საშუალებას წარმოადგენს. SOUEAST-ის ავტომობილები წარმოდგენილია გეზ მოტორსის მულტიბრენდულ  შოურუმში, რომელიც კახეთის გზატკეცილის #15-ში მდებარეობს.  ადგილზე მომხმარებლებს შესაძლებლობა  აქვთ, გაეცნონ SOUEAST-ის სრულ ასორტიმენტს და ისარგებლონ ტექნიკური მომსახურებით. SOUEAST საავტომობილო ბრენდია, რომელიც 1995 წელს დაარსდა. თავდაპირველად ბრენდი Mitsubishi Motors-თან ერთად აწარმოებდა ავტომობილებს საერთაშორისო ბაზრებისთვის. 2024 წლიდან კი ის ერთ-ერთ უმსხვილეს გლობალურ  ავტომწარმოებელს Chery Group-ს შეუერთდა. ამ გაერთიანების შედეგად SOUEAST ახალი იდენტობა მიენიჭა, რაც ყოველდღიური ცხოვრების რიტმის გამარტივებაში ითარგმნება. SOUEAST სპეციალიზებულია SUV ავტომობილებზე და მომხმარებლებს თანამედროვე ტექნოლოგიებს, უსაფრთხოების ინტეგრირებულ სისტემებს, კომფორტულ ინტერიერსა და დახვეწილ დიზაინს სთავაზობს. სამომავლოდ, „გეზ მოტორსი“ სადილერო ქსელის გაფართოებას გეგმავს, როგორც საქართველოში, ისე რეგიონებში. 2026 წელს კომპანია ბაზარზე ახალ SUV კლასის დატენვად ჰიბრიდს - SOUEAST S08 DM-ს წარადგენს, რომელიც კიდევ უფრო მეტად იქნება მორგებული ქართულ რეალობასა და მომხმარებლის მოთხოვნაზე.„SOUEAST-ის საქართველოში შემოსვლა „გეზ მოტორსისთვის“ მნიშვნელოვანი სტრატეგიული ნაბიჯია.  ეს ჩვენი კომპანიის განვითარების ახალ ეტაპს წარმოადგენს. ბრენდის ფილოსოფია, ტექნოლოგიური ხედვა და საერთაშორისო გამოცდილება სრულად ეხმიანება იმ მიმართულებას, რომლითაც „გეზ მოტორსი“ წლებია ვითარდება. ეს არის ბრენდი, რომელიც აერთიანებს მრავალწლიან საავტომობილო გამოცდილებას, თანამედროვე ტექნოლოგიებსა და კომფორტს. ჩვენი მიზანია ქართველი მომხმარებლებს შევთავაზოთ საერთაშორისო სტანდარტებზე დაფუძნებული, სანდო და მომხმარებელზე ორიენტირებული საავტომობილო ბრენდი. ამ პროცესში საქართველოს ბანკის როლი განსაკუთრებით მნიშვნელოვანია - პარტნიორის, რომელიც არა მხოლოდ ფინანსური კუთხით გვიჭერს მხარს, არამედ გვიზიარებს გამოცდილებასა და ბიზნესის განვითარების ხედვას. ეს თანამშრომლობა გვაძლევს სტაბილურობასა და თავდაჯერებულობას, რათა სწორად დავგეგმოთ კომპანიის განვითარება, გავზარდოთ მასშტაბი და უზრუნველვყოთ პროექტის მდგრადობა. სამომავლოდ, ახალი მოდელების შემოყვანას და სადილერო ინფრასტრუქტურის განვითარებას ვგეგმავთ როგორც თბილისში, ისე რეგიონებში, რაც პროექტის გრძელვადიან წარმატებას განსაზღვრავს“, - განაცხადა ლევან მიქაძემ,  „გეზ მოტორსის“ კომერციულმა დირექტორმა.ინფორმაციისთვის, SOLO მომხმარებლებისთვის სპეციალური ფასდაკლება მოქმედებს. შეთავაზების სანახავად ეწვიეთ ბმულს.   

საქართველოს ბანკი ბიზნესის განვითარების ხელშეწყობას და სტუმარმასპინძლობის სექტორის გაძლიერებას აგრძელებს. ამჯერად, ბანკთან პარტნიორობით თბილისში, ნინო ჩხეიძის ქუჩა №10-ში, Artifact Apart Hotel გაიხსნა.Artifact Apart Hotel თბილისის ისტორიულ უბანში მდებარეობს და 15 ინდივიდუალურ საცხოვრებელ აპარტამენტს აერთიანებს. აპარტამენტები სრულად არის აღჭურვილი საჭირო თანამედროვე ტექნიკითა და ინვენტარით. სასტუმროს ინფრასტრუქტურა მოიცავს შიდა ეზოს და კაფეს Maluli by Chocoart, სადაც სტუმრებს ხელნაკეთი შოკოლადისა და სხვადასხვა კერძების დაგემოვნების შესაძლებლობა აქვთ.“Artifact Apart Hotel-ის პროექტზე მუშაობის პროცესში ჩვენი ძირითადი მიზანი იყო სივრცის გარდაქმნა ისე, რომ შეგვენარჩუნებინა მისი ისტორიული იდენტობა და კავშირი წარსულთან. ჩვენი გუნდი აქტიურად იკვლევდა უბანს, რათა პროექტის არქიტექტურულ და სივრცით გადაწყვეტაში ისტორიული მემკვიდრეობა სწორად ასახულიყო. პროექტის განხორციელებისას განსაკუთრებული ყურადღება დავუთმეთ მის ფუნქციურ დაგეგმარებასა და ინტერიერის დიზაინში გამოყენებულ მასალებს, რაც ყოველდღიური გამოყენებისთვის ადაპტირებულ, კომფორტულ გარემოს ქმნის. Artifact Apart Hotel უკვე წარმატებით ოპერირებს ბაზარზე და აქტიურად ვმასპინძლობთ როგორც მოკლევადიან, ისე გრძელვადიან ვიზიტორებს. ჩვენი მიზანია მათ მაღალი ხარისხის მომსახურება მივაწოდოთ  და სასიამოვნო გამოცდილება შევუქმნათ”, - განაცხადა ლიკა ჭუმბურიძემ, Artifact Apart Hotel - ის დირექტორმა.„საქართველოს ბანკი აქტიურ რეჟიმში აგრძელებს პარტნიორი ბიზნესების და მათი ინიციატივების მხარდაჭერას, რომლებიც ქვეყანაში სტუმარმასპინძლობის სექტორის განვითარებას უწყობს ხელს. მოხარულები ვართ, რომ ჩვენი მხარდაჭერით, თბილისში კიდევ ერთი აპარტ-სასტუმრო გაიხსნა. გვჯერა, სასტუმრო მიმზიდველი იქნება როგორც ადგილობრივი, ისე საერთაშორისო ტურისტებისთვის. მინდა წარმატებები ვუსურვო გუნდს, ჩვენ კი არ ვჩერდებით და ვაგრძელებთ ბიზნესების გაძლიერებას“, - განაცხადა საქართველოს ბანკის კორპორაციული გაყიდვების სექტორის უფროსმა ირაკლი კიკალიშვილმა.

საქართველოს ბანკი, როგორც განათლების მთავარი მხარდამჭერი, მოსწავლეებისთვის განათლების შესაძლებლობების შექმნას განაგრძობს. ამისათვის, უკვე 10 წელზე მეტია, საგანმანათლებლო პროექტებს ახორციელებს და უჭერს მხარს. ამ მიმართულებით კი ბანკის პორტფელი 40-ზე მეტ ინიციატივას ითვლის.მხოლოდ 2025 წელს, საქართველოს ბანკმა 30 საგანმანათლებლო პროექტი განახორციელა, რომელთა მეშვეობით 300 000-ზე მეტი მოსწავლისთვის, სტუდენტისთვის, ახალგაზრდა პროფესიონალისა და მასწავლებლისთვის შექმნა განათლების შესაძლებლობა.მათ შორის ერთ-ერთი გამორჩეული ინიციატივა საქართველოს ბანკის ინოვაციური ბიბლიოთეკები - იდეათეკებია. მეექვსე წელია, საქართველოს ბანკი პარტნიორებთან ერთად, მულტიფუნქციურ ბიბლიოთეკებს - იდეათეკებს მთელი საქართველოს მასშტაბით სხვადასხვა რეგიონის სკოლაში ხსნის, რითაც ახალგაზრდებს აძლევს წვდომას განათლების მისაღებად საჭირო ყველა რესურსზე. ყოველი იდეათეკა აღჭურვილია 2000-ზე მეტი წიგნისგან დაკომპლექტებული მრავალფეროვანი ბიბლიოთეკით, პროექტორებითა და კომპიუტერებით. ამასთან, სივრცე მოსწავლეებს აძლევს წვდომას STEM კუთხეზე, რაც ეხმარება მათ, გაეცნონ STEM მიმართულების საფუძვლებს და გადადგან პირველი ნაბიჯები დიდი აღმოჩენებისკენ.დღეისათვის საქართველოს ბანკის ინოვაციური ბიბლიოთეკა ქვეყნის მასშტაბით 11 რეგიონის 25 სკოლაში ფუნქციონირებს და 18 000-ზე მეტი მოსწავლისთვის ქმნის ახალი აღმოჩენებისა და შემეცნების სივრცეს. იდეათეკების პროექტი გრძელდება და ინიციატივის ფარგლებში, საქართველოს მასშტაბით კიდევ არაერთი ინოვაციური ბიბლიოთეკის გახსნა იგეგმება.საქართველოს ბანკის მიერ განხორციელებული საგანმანათლებლო პროექტების შესახებ დეტალური ინფორმაციის მისაღებად ეწვიეთ ვებგვერდს: ganatleba.bog.ge