სინგაპურის პრემიერ-მინისტრის, მსოფლიოში ყველაზე მაღალანაზღაურებადი პოლიტიკოსის, ლოურენს ვონგის წლიური ხელფასი 64%-ით გაიზრდება. მისი ხელფასი 1 მილიონ დოლარზე მეტით გაიზრდება, წერს Reuters.ვონგის ამჟამად წლიური შემოსავალი 1.7 მილიონი აშშ დოლარია (2.2 მილიონი სინგაპურული დოლარი). ზრდის შემდეგ ის 2.8 მილიონს (3.6 მილიონს) მიაღწევს. სინგაპურში ყველა მაღალი რანგის საჯარო მოხელე მაღალ ხელფასს იღებს - ამან კორუფციასთან ბრძოლას უნდა შეუწყოს ხელი.8 სექტემბერს პარლამენტში გამოსვლისას ვონგმა განაცხადა, რომ მთავრობის ხელფასების მდგომარეობის შესასწავლად შექმნილმა დამოუკიდებელმა კომისიამ დაასკვნა, რომ მინისტრების ხელფასების გაზრდაა საჭირო. ადრე ერთი ხელფასი დაახლოებით 870 ათასი დოლარი (1.1 მილიონი სინგაპურის დოლარი) იყო, ახლა კი 1.74 მილიონი (2.2 მილიონი) გახდა. პრემიერ-მინისტრი მინისტრის ხელფასის ორმაგს იღებს.თანამდებობის პირებისთვის ხელფასების ზრდა 15 ოქტომბრიდან დაიწყება. მინისტრები თანდათან მიიღებენ დანამატს, რადგან ეს დამოკიდებული იქნება „კონკრეტულ გარემოებებზე“.წყარო snob.ru

აშშ-ის პრეზიდენტმა დონალდ ტრამპმა რუსეთის პრეზიდენტ ვლადიმერ პუტინს უკრაინაში ომის სწრაფად დასრულების შემთხვევაში ორ ქვეყანას შორის ეკონომიკური და სავაჭრო ურთიერთობების სრულად აღდგენა შესთავაზა,- ინფორმაციას ამის შესახებ CNBC ავრცელებს.ტრამპსა და პუტინს შორის სატელეფონო საუბარი დაახლოებით ერთი საათის განმავლობაში გაგრძელდა. მხარეებმა უკრაინაში სამშვიდობო მოლაპარაკებების განახლებისა და ომის დასრულების გზებზე ისაუბრეს.საუბრისას ლიდერებმა ასევე განიხილეს აშშ-ის სპეციალური წარმომადგენლის, სტივ უიტკოფისა და დონალდ ტრამპის სიძის, ჯარედ კუშნერის მოსკოვსა და კიევში ვიზიტების შედეგები.კრემლის წარმომადგენლის, იური უშაკოვის განცხადებით, ტრამპმა კიდევ ერთხელ დააფიქსირა უკრაინაში სამხედრო მოქმედებების უმოკლეს ვადაში დასრულების სურვილი. თავის მხრივ, პუტინმა ამერიკის პრეზიდენტს ფრონტზე არსებული ვითარების შესახებ რუსეთის შეფასებები და ინფორმაცია მიაწოდა.ტრამპის შეთავაზება აშშ-სა და რუსეთს შორის სავაჭრო და ეკონომიკური ურთიერთობების აღდგენას უკავშირდება და მისი განხორციელება უკრაინის ომის დროულ დასრულებაზეა დამოკიდებული.

თუ რუსეთი სამხედრო ბაზის სომხეთიდან გაყვანას გადაწყვეტს, ჩვენ წინააღმდეგი არ ვიქნებით, - ამის შესახებ სომხეთის პრემიერ-მინისტრმა ნიკოლ ფაშინიანმა განაცხადა.ფაშინიანის განცხადებით, რუსეთის 102-ე სამხედრო ბაზას სომხეთისთვის „სასიცოცხლო მნიშვნელობა არ აქვს“.„ჩვენ წინააღმდეგი არ ვიქნებით, მაგრამ თუ დარჩენის სურვილს გამოთქვამენ, ასევე, მზად ვართ ეს საკითხიც განვიხილოთ. თუმცა, მთელი ამ დროის განმავლობაში ჩვენ ეს საკითხი დღის წესრიგში არასდროს დაგვიყენებია“, - განაცხადა ფაშინიანმა.ცნობისთვის, გუშინ, რუსეთის პრეზიდენტმა ვლადიმერ პუტინმა განაცხადა, რომ რუსეთი მზად არის სომხეთიდან სამხედრო ბაზა გაიყვანოს, თუ ამას სომხეთი გადაწყვეტს.„თუ სომხეთი მიიჩნევს, რომ რუსული სამხედრო ბაზა სომხეთში საჭირო აღარაა, ჩვენ ხვალვე გავალთ. მაგრამ, სომხეთი მზად არის ამისთვის? ჩვენ არავის არაფერს ვახვევთ თავს", - აღნიშნა პუტინმა.ipn.ge

აგვისტოში SpaceX-ისა და Tesla-ს აქციების ფასის, შესაბამისად, 33%-ითა და 18%-ით მატებამ ილონ მასკის ქონება ერთ თვეში $202 მილიარდით გაზარდა. შედეგად, ამერიკული Forbes-ის შეფასებით, ამჟამად მასკი $892 მილიარდს ფლობს და ისტორიულ, $1-ტრილიონიან ნიშნულთან დასაბრუნებლად შედარებით მცირე თანხა აშორებს.გასული თვის მკვეთრი ზრდის მიუხედავად, მსოფლიოს უმდიდრესი ადამიანის ქონება ჯერ კიდევ მნიშვნელოვნად ჩამორჩება რეკორდულ მაჩვენებელს, $1.33 ტრილიონს, რომელსაც მან SpaceX-ის აქციების ფასის პიკის პერიოდში, ივნისის შუა რიცხვებში მიაღწია.აღსანიშნავია, რომ მასკი მსოფლიოს მეორე უმდიდრეს ადამიანზე, Google-ის თანადამფუძნებელ ლარი პეიჯზე, სამჯერ მეტ ქონებას ფლობს. ამჟამად პეიჯის ქონება $277 მილიარდს უტოლდება. აგვისტოში მისი ქონება $15 მილიარდით შემცირდა, რაც თვის განმავლობაში მილიარდერებს შორის ყველაზე დიდი კლებაა.გასულ თვეში $10 მილიარდით შემცირდა Amazon-ის დამფუძნებლის, ჯეფ ბეზოსის, ქონება, ხოლო Google-ის მეორე თანადამფუძნებლმა, სერგეი ბრინმა, ამავე პერიოდში $13 მილიარდი დაკარგა. მიუხედავად ამისა, Forbes-ის მსოფლიოს უმდიდრესი ადამიანების რეიტინგში პოზიციების შენარჩუნება ორივემ შეძლო და ისინი, შესაბამისად, მესამე და მეოთხე ადგილებზე დარჩნენ.Oracle-ის აქციების ფასის 15%-იანი ზრდის შედეგად, ლარი ელისონის ქონება $25 მილიარდით გაიზარდა და $193 მილიარდს მიაღწია. შედეგად, ის მეშვიდე ადგილზე გადავიდა – ერთი პოზიციით მაღლა, ვიდრე ივლისში იყო. ელისონი აგვისტოში ქონების ზრდის მხრივ მასკის შემდეგ მეორე ყველაზე წარმატებული მილიარდერი გახდა.Nvidia-ს თანადამფუძნებლისა და აღმასრულებელი დირექტორის, ჯენსენ ჰუანგის, ქონება კი $17 მილიარდით გაიზარდა. მიუხედავად ამისა, მან ელისონთან პოზიციები გაცვალა და რეიტინგში მერვე ადგილი დაიკავა.ათეულს მიღმა აღმოჩნდნენ ბერნარ არნო და უორენ ბაფეტი, რომლებიც თავიანთი კარიერის განმავლობაში სხვადასხვა პერიოდში მსოფლიოს უმდიდრესი ადამიანის სტატუსს ფლობდნენ. არნოს პოზიციაზე გავლენა LVMH-ის აქციების ფასის ვარდნამ იქონია, რაც ჩინელი მომხმარებლების მიერ ფუფუნების საგნებზე ხარჯების შემცირებას უკავშირდება. ბაფეტის Berkshire Hathaway-ის აქციები კი მას შემდეგ გაუფასურდა, რაც კომპანიამ ბოლო 12 თვის მაქსიმუმი დააფიქსირა.მათი ადგილები რეიტინგში Microsoft-ის ყოფილმა აღმასრულებელმა დირექტორმა, სტივ ბალმერმა, და Zara-ს მშობელი კომპანიის, Inditex-ის, ყოფილმა ხელმძღვანელმა ამანსიო ორტეგამ დაიკავეს.აგვისტოში ბალმერის ქონება $10 მილიარდით გაიზარდა, რის შედეგადაც ის მე-11 ადგილიდან მეცხრე ადგილზე გადავიდა. ორტეგას ქონება კი $5 მილიარდით გაიზარდა, რამაც მას მე-12 ადგილიდან მე-10 პოზიციაზე გადასვლის საშუალება მისცა.Forbes-ის შეფასებით, 2026 წლის 1-ელი სექტემბრის მდგომარეობით, მსოფლიოს 10 უმდიდრესი ადამიანის ქონება $2.8 ტრილიონს შეადგენს. ერთი თვის წინ ეს მაჩვენებელი $2.6 ტრილიონი იყო.ვრცლად forbes.ge - ზე

მერილენდის შტატის ფედერალურმა რაიონულმა სასამართლომ გადაწყვიტა, შეაჩეროს ტრამპის ადმინისტრაციის მცდელობა, ე.წ. „სამშობიარო ტურიზმის“ აკრძალვასთან დაკავშირებით. ამის შესახებ CBS News-ი წერს.2 სექტემბერს, აშშ-ის რაიონული სასამართლოს მოსამართლე დებორა ბორდმანმა დროებით დაბლოკა ტრამპის ადმინისტრაციის მცდელობა, მიეღო ახალი კანონი. მოსამართლემ განაცხადა, რომ მოსარჩელეები შეძლებენ დაამტკიცონ, რომ კანონი არღვევს ადამიანთა უფლებებს აშშ-ის კონსტიტუციის მე-14 შესწორებით, რომელიც შეერთებულ შტატებში დაბადებული ყველა პირისთვის მოქალაქეობის მიღებას უზრუნველყოფს.აღსანიშნავია, რომ სასამართლოს გადაწყვეტილება საბოლოო არ არის და საქმე განხილვის პროცესშია.ცნობისთვის, 2025 წლის იანვარში, თანამდებობის დაკავების შემდეგ, ტრამპი არაერთგზის ცდილობდა, აღნიშნული კანონის ცვლილებას. მას შემდეგ, რაც უზენაესმა სასამართლომ ივნისში უარყო მისი პირველი მცდელობა დაბადების უფლების მქონე მოქალაქეობის გაუქმების შესახებ, ტრამპმა აგვისტოში ხელი მოაწერა კიდევ ერთ, უფრო შემზღუდავ ბრძანებას, რომლითაც აშშ-ის მოქალაქეობა არ უნდა მიენიჭებინათ „მტრულად განწყობილ უცხოელთა“, უცხო ქვეყნების მთავრობების თანამშრომლებისა და ე.წ. „სამშობიარო ტურიზმში“ ეჭვმიტანილი პირების შვილებისთვის.BPN

Microsoft-ის თანადამფუძნებელი ბილ გეიტსი ხელოვნური ინტელექტის განვითარებაზე მკაცრი შეზღუდვების დაწესების მომხრეა. ამერიკელი მილიარდერი ბიზნესმენის შეფასებით, წინააღმდეგ შემთხვევაში, ადამიანებისადმი AI-ის მიერ მიყენებული ზიანი მის სარგებელს გადააჭარბებს.„AI ან ყველაზე ძლიერი გამათანაბრებელი ძალა იქნება, რომელიც ოდესმე შექმნილა, ან უსამართლობის ყველაზე დიდი წყარო“, — წერს გეიტსი მის მიერ გამოქვეყნებულ 6 000-სიტყვიან წერილში, სახელწოდებით: „ტურბულენტური AI-ის ეპოქა უკვე დადგა. გადაწყვეტილებები, რომელთაც ახლა ვიღებთ, გადამწყვეტია“.გეიტსი არც პირველია ტექნოლოგიური სფეროს იმ წამყვან ლიდერებს შორის, რომლებიც AI-ის სწრაფ განვითარებასთან დაკავშირებულ საფრთხეებზე ღიად საუბრობენ. თუმცა მისი მოსაზრებები კიდევ უფრო აძლიერებს შეშფოთებას ტექნოლოგიის გავრცელებით გამოწვეული სამუშაო ადგილების შესაძლო დაკარგვის შესახებ, განსაკუთრებით იმ ფონზე, რომ AI-კომპანიები და Wall Street-ი ამ მიმართულებით ინვესტიციებს აძლიერებენ.გეიტსი, რომელიც გასულ საუკუნეში პერსონალური კომპიუტერების რევოლუციის ერთ-ერთი მთავარი შემოქმედი იყო, მიიჩნევს, რომ შემდეგი ტექნოლოგიური რევოლუცია — შესაბამისად, ხელოვნური ინტელექტი — საზოგადოებაზე გაცილებით უფრო დიდ გავლენას იქონიებს.„საუკეთესო სცენარის შემთხვევაშიც კი, AI-ის ახალ ეპოქაზე გადასვლა კაცობრიობის ისტორიაში ერთ-ერთი ყველაზე ტურბულენტური პერიოდი იქნება“, — წერს გეიტსი და აღნიშნავს, რომ ხელმძღვანელები, ექსპერტები და საზოგადოება ამ გამოწვევებისთვის სათანადოდ არ ემზადებიან. „არანაირი გეგმა არ არსებობს, რომელიც AI-ეპოქაზე გადასვლას გაამარტივებს“, — აცხადებს Microsoft-ის თანადამფუძნებელი.გეიტსის თქმით, AI-ს სხვადასხვა სფეროსთვის, მათ შორის სოფლის მეურნეობისა და მედიცინისთვის, მნიშვნელოვანი სარგებლის მოტანაც შეუძლია, თუნდაც დაავადებების პრევენციისა და მკურნალობისთვის შესაბამისი გზების მოსაძებნად. თუმცა გეიტსი AI-ის განვითარების სერიოზულ რისკებსაც არ უგულებელყოფს,  როგორიცაა, მაგალითად, უმუშევრობა, ბავშვების საგანმანათლებლო და სოციალური განვითარების შეფერხება, ასევე არალეგალური საქმიანობებისთვის პროცესის გამარტივება.„რაც უფრო მეტად ძლიერდება მოდელები, მით უფრო დიდი შანსია, მათ ჩვენი ინტერესების წინააღმდეგ დაიწყონ მოქმედება და კონტროლი დავკარგოთ“, — ამბობს გეიტსი. მისივე განცხადებით, ეს რისკები სწრაფად უნდა გაკონტროლდეს და AI-ის განვითარების გლობალურად შენელებისთვის სანდო გეგმის არსებობის შემთხვევაში, მილიარდერი ამ გეგმის მხარდაჭერასაც არ გამორიცხავს.„თუმცა არ ვფიქრობ, რომ ეს [გეგმა] იარსებებს. გეოპოლიტიკური და ეკონომიკური ინტერესები იმდენად ძლიერია, რომ ისინი AI-ის სწრაფი განვითარებისკენ გვიბიძგებს“, — წერს გეიტსი.AI-დან მომდინარე საფრთხეებზე გეიტსმა CNN-თან ინტერვიუში ისაუბრა. ამერიკელი ბიზნესმენის თქმით, AI-მოდელები იმაზე სწრაფად და მნიშვნელოვნად გაძლიერდა, ვიდრე თავად ელოდა. მათ შორის, თანამედროვე მოდელებს უკვე შეუძლიათ კიბერშეტევების, ბიოტერორიზმისა და ფსიქოსოციალური ზიანის რისკების შექმნა.გეიტსი AI-სა და რობოტების გამოყენების დაბეგვრის ინიციატივითაც გამოდის, ზუსტად ისე, როგორც ეს ადამიანების შრომის ანაზღაურებასთან დაკავშირებით ხდება. მილიარდერი მიიჩნევს, რომ მსგავსი მიდგომა ადამიანური შრომიდან ავტომატიზაციაზე გადასვლის პროცესს შეანელებს. ამასთან ერთად კი, გეიტსი მიიჩნევს, რომ გარკვეული ტიპის სამუშაოები მხოლოდ ადამიანებისთვის უნდა იყოს განკუთვნილი.„ჩემი გზავნილი ლიდერებისთვის ასეთია: ახლა თქვენ შესაძლებლობა გაქვთ, იმოქმედოთ — მანამ, სანამ უმუშევრობა მკვეთრად გაიზრდება, საზოგადოება მნიშვნელოვნად დაზარალდება და ადამიანების ნდობა შეირყევა. თქვენ შეგიძლიათ უზრუნველყოთ, რომ ხელოვნურმა ინტელექტმა ყველას სარგებელი მოუტანოს“, — განაცხადა გეიტსმა.წყარო: forbes.ge

„ტანკერს, რომელიც სანქციადადებული გემების სიაშია, თურქეთიდან - ნატოს წევრი სახელმწიფოდან - ბენზინი რუსეთის ბალტიის ზღვის ნავსადგურში გადააქვს; ხელმოწერილია შეთანხმება ყაზახეთთან, რუსული ნავთობის გადასამუშავებლად და ბენზინის იმპორტზე. ბენზინით დატვირთული ტანკერები, ეგვიპტის სუეცის არხის გავლით, ინდოეთიდან რუსეთისაკენ მიცურავენ...კრემლი თავის მიმართ ლოიალურად განწყობილ ქვეყნებს სთხოვს, რომ რუსეთს ჰაერივით საჭირო საწვავი მიჰყიდონ. შეიძლება კიდევ სხვა მაგალითები დავასახელოთ, მაგრამ ესეც საკმარისია, რომ დასკვნამდე მივიდეთ: რუსეთის ნავთობგადამამუშავებელი მრეწველობა უმწვავეს კრიზისშია“, - წერს ბრიტანული გაზეთი „გარდიანი“ (The Guardian) სტატიაში სათაურით: „უკრაინული დრონების შეტევებმა რუსეთი აიძულა, საწვავის იმპორტი დაეწყო: მსოფლიოში ერთ-ერთი უდიდესი ნავთობის მომპოვებელი ქვეყანა ბენზინის მათხოვრად გადაიქცა“ (ავტორი - პიტერ ბომონტი, ანალიტიკოსი, საერთაშორისო მიმომხილველი).პუბლიკაციაში გაანალიზებულია რუსეთში შექმნილი კრიზისული სიტუაცია, რომელიც საავტომობილო ბენზინის მწვავე დეფიციტით არის გამოწვეული.გთავაზობთ სტატიას მცირე შემოკლებით:მხოლოდ ერთი ზაფხულის განმავლობაში რუსეთი, რომელიც ოდესღაც მსოფლიოში მეორე ადგილზე იყო ნედლი ნავთობის მოპოვებით, დღეს იძულებულია, ბენზინის (და დიზელის) წყაროები ეძებოს, რომ როგორმე „ამოქოლოს“ უკრაინული დრონების დაბომბვებით გაჩენილი ხვრელები, საწვავით უზრუნველყოფის საქმეში: შეიძლება ერთმნიშვნელოვნად ითქვას, რომ რუსეთის ნავთობგადამამუშავებელი მრეწველობა უმწვავეს კრიზისშია.ბოლო კვირების განმავლობაში კრემლი გამალებით ცდილობს ენერგეტიკული კრიზისის მოგვარებას, რომელსაც უკვე ვერაფრით ვეღარ ნიღბავს - ყველგან, თვით მოსკოვშიც კი, ბენზინგასამართ სადგურებთან ავტომობილების უსასრულო რიგებია. ქვეყნის ევროპულ (და აზიურშიც) ნაწილში განლაგებული ნავთობის გადამამუშავებელი ქარხნებიდან თითქმის ყველა პარალიზებულია.მიმდინარე კვირაში რუსეთმა პირველად იყიდა თურქეთისაგან ბენზინის დიდი პარტია, 200 ათასი ბარელის მოცულობით. ტანკერი მერსინის ნავსადგურიდან ბალტიისპირა პორტში - პრიმორსკში უნდა ჩავიდეს, ინდოეთიდან კი, ვადინარის ქარხნიდან, რუსეთისაკენ უკვე მეხუთე ტანკერი მიცურავს: კრემლმა მთლიანობაში ერთი მილიონი ბარელი ბენზინი შეისყიდა.ახლახან რუსეთმა შეთანხმება გააფორმა ყაზახეთთან - კომპანია „კონდენსატთან“, რომლის ქარხნები ქვეყნის დასავლეთ ნაწილში მდებარეობენ. დოკუმენტის პირობის თანახმად, რუსეთი კომპანიას თავის ნავთობს მიაწვდის, რომლის 70% ბენზინის სახით დაუბრუნდება. რადგან ქარხანა რუსეთთან მილსადენით არ არის დაკავშირებული, ნავთობის მიწოდება და ბენზინის დაბრუნება რკინიგზით მოხდება.ამ ზაფხულს რუსეთმა მნიშვნელოვნად გააფართოვა ბენზინის იმპორტი ბელარუსიდან - თავისი მოკავშირიდან უკრაინის წინააღმდეგ ომში. მიმდინარე წლის ივნის-ივლისში, წინა წლის ანალოგიურ პერიოდთან შედარებით, ბელარუსიდან ბენზინის იმპორტი 141-ჯერ გაიზარდა.თავდაპირველად კრემლის ჩინოვნიკები იმედოვნებდნენ, რომ რუსეთი როგორმე საკუთარი რესურსებით გადალახავდა საწვავის კრიზისს, იყო ამის ნიშნები, მაგრამ აგვისტოში სიტუაცია ისევ გამწვავდა - მთლიანად გაჩერდა ორსკის ნავთობგადამამუშავებელი ქარხანა - ერთ-ერთი უდიდესი ქვეყანაში. ამჟამად რუსეთის სულ მცირე ექვს რეგიონში საწვავის გაცემა მკაცრად ლიმიტირებულია.მიუხედავად იმისა, რომ რუსეთის პრემიერ-მინისტრის მოადგილე ალექსანდრე ნოვაკი აცხადებს, რომ ბოლო ხანებში სიტუაცია სტაბილიზდება, ფედერალური შტაბი ნაყოფიერად მუშაობსო, მდგომარეობას გაუმჯობესება მაინცდამაინც არ ეტყობა.უკრაინის მიზანი ნათელია: მიიტანოს რუსეთის მოსახლეობამდე ის აზრი, რომ უკრაინის მოსახლეობის მსგავსად, ისინი იძულებულნი იქნებიან მწარე რეალობა გააცნობიერონ - ომის ფასს ისინიც გადაიხდიან.საერთაშორისო სანქციური რეჟიმის პირობებში, რომელმაც უკვე მიაყენა დიდი ზიანი რუსეთის ეკონომიკას, ნავთობის გადამამუშავებელი ქარხნების გაჩერება არა მარტო ძირს უთხრის ვლადიმერ პუტინის შემოსავლებს ომის გასაგრძელებლად, არამედ იწვევს საწვავის შიდაკრიზისსაც, რომელიც იმდენად მძიმეა, რომ მთავრობის მიერ რადიკალური ზომების მიღება (უცხოური ბენზინის იმპორტი პირველად!) სიტუაციას ვერ შველის.აგვისტოში უკრაინამ 18 თავდასხმა განახორციელა, რუსეთის ნავთობგადამამუშავებელ ქარხნებზე, რაც რეკორდულია თავისი რაოდენობით. დარგობრივ ანალიტიკოსთა მონაცემებით, ჯერ კიდევ მაშინ, როცა უკრაინამ თავისი კამპანია გააფართოვა, რუსული ქარხნების წინააღმდეგ, ბენზინის წარმოება 28%-ით იყო შემცირებული.ივნისში ავსტრალიელმა გადამდგარმა გენერალმა მიკ რაიანმა განაცხადა, რომ უკრაინა არ გაჩერდება და თავის ძალისხმევას გააგრელებს იმ მიზნით, რომ რუსეთის ნავთობმოპოვება და ნავთობგადამუშავება მნიშვნელოვნად შემცირდეს. „ვლადიმერ პუტინს არასოდეს საჯაროდ უკან არ დაუხევია თავისი მაქსიმალისტური ამბიციებისაგან, რომ უკრაინა დაიმორჩილოს. კიევის დარტყმები მიმართულია არა იქითკენ, რომ მან თავისი რიტორიკა შეცვალოს, არამედ იმისკენ, რომ მისი გათვლები ჩაიშალოს“, - აღნიშნა მან.„ამჟამინდელი სტრატეგია, საბოლოო ჯამში, არის შეჯიბრი სხვადასხვა კონკურირებად გათვლებს შორის. უკრაინა ფსონს დებს იმაზე, რომ რუსეთის ეკონომიკა მუდმივი ზეწოლის ქვეშ იყოს. დადგება დრო, როცა კრემლი ბრძოლის ველზე თავის ჯარებს ვეღარ მოამარაგებს. შეიძლება ეს სწრაფად არ მოხდეს, მაგრამ ვლადიმერ პუტინი გააცნობიერებს, რომ დრო მის სასარგებლოდ არ მუშაობს“, - განაცხადა მიკ რაიანმა.წყარო: კვირის პალიტრა

რუსეთში საქართველოს გავლით კანადაში მოპარული ავტომობილები შედის. ამის შესახებ The New York Times საერთაშორისო საპოლიციო ორგანიზაციის, ინტერპოლის მონაცემებზე დაყრდნობით წერს.კერძოდ, კანადის პოლიციის მონაცემებით, კონტრაბანდისტებს მოპარული კანადური ავტომობილები რუსეთში ხშირად არაბთა გაერთიანებული საემიროების გავლით გადაჰყავთ. ოფიციალურმა პირებმა, ასევე, დაადგინეს მარშრუტები საქართველოს, ყაზახეთის, ყირგიზეთისა და ლიეტუვის გავლით.ინტერპოლის მონაცემებით, ბოლო ორი წლის განმავლობაში რუსეთში, დაახლოებით, 5000 მოპარული კანადური ავტომობილი კონტრაბანდულად შეიყვანეს. კერძოდ, ინტერპოლმა 4798 შეტყობინება მიიღო, რომ 2024 წლის თებერვლიდან 2026 წლის ივლისამდე რუსეთში მოპარული კანადური ავტომობილები იქნა ნაპოვნი.კანადის სასაზღვრო სააგენტოს ცნობით, ყოველ კვირას მონრეალის პორტში ათეულობით კონტეინერი იჩხრიკება და 20-დან 30-მდე მოპარული მანქანა ვლინდება, რომელთა საერთო ღირებულება 2 მლნ დოლარამდეა. მსგავსი შემოწმებები სხვა პორტებშიც ტარდება. გასულ წელს კანადელებს საზღვარგარეთიდან, მათ შორის, რუსეთიდან, დაახლოებით, 200 მოპარული ავტომობილი დაუბრუნდათ. მაგალითად, გასულ თვეში რუსეთიდან კანადაში ექვსი მოპარული მანქანა ჩავიდა.The New York Times წერს, რომ მანქანები კანადიდან გადაზიდვის კონტეინერებით გადის და რუსეთში ახლო აღმოსავლეთის, საქართველოს, ყაზახეთის, ყირგიზეთისა და ლიეტუვის გავლით არის იმპორტირებული.კანადაში ყველაზე ხშირად მოპარულ ავტომობილებს შორის პიკაპები, Ford F-150, Dodge Ram და Toyota Tundra-ა. გამოცემა წერს, რომ ეს მანქანები ქვეყნიდან „შეკვეთით“ და კონტრაბანდულად ყველაზე ხშირად გააქვთ. კერძოდ, საერთაშორისო ბაზარზე რუსული კრიმინალური დაჯგუფებები შედიან და კანადურ ორგანიზაციებთან კავშირს ამყარებენ. ამ პიკაპებს რუსეთი უკრაინის ფრონტის ხაზზე დრონების გასაშვებად იყენებს. ისინი სატელიტიდან ირანშიც დააფიქსირეს.მოპარული ავტომობილი ინტერპოლის მონაცემთა ბაზაში მყისიერად არ ხვდება; ამას თვეები სჭირდება. ამ დროის განმავლობაში ის ოკეანეებს, ყველა საბაჟო საზღვარს ადვილად კვეთს და რუსეთის ფედერაციაში შედის. მონაცემთა ბაზაში დამატების დროისთვის ავტომობილი უკვე რამდენჯერმე არის გადაყიდული.“იმის მიუხედავად, რომ დასავლური ექსპორტის აკრძალვამ რუსეთი ავტობაზრის დიდ ნაწილს ჩამოაშორა, მათ ბრენდირებულ ჯიპებსა და პიკაპებზე მოთხოვნა არ შეუმცირებიათ. ამან კრიმინალების დახვეწილი ქსელის გაჩენა გამოიწვია, რომელიც ავტომობილებს იპარავს, მათ სატვირთო კონტეინერებში მალავს და რუსეთში ყველაზე ხშირად ახლო აღმოსავლეთის გავლით აგზავნის,” - წერს The New York Times.BPN

„ხაჭაპურის ერთ-ერთი ყველაზე პოპულარული სახეობა - ღია ღვეზელი, რომელიც ყველის და კვერცხის ნაზავით არის სავსე“ - ასე მოიხსენიებს პოპულარული Tasteatlas-ი აჭარულ ხაჭაპურს, რომელიც 100 საუკეთესო ყველის კერძს შორის მეორე ადგილზე განთავსდა.„ხაჭაპურის ერთ-ერთი ყველაზე პოპულარული სახეობა - ღია ღვეზელი, რომელიც ყველის და კვერცხის ნაზავით არის სავსე.ძირი მზადდება საფუარიანი ცომისგან, რომელიც მოგრძო ფორმაშია გახვეული და ტრადიციულად სულგუნით ან იმერული ყველით, ან ორივეს კომბინაციით არის სავსე.კერძს ზემოდან კვერცხს ასხამენ და შემდეგ ღვეზელს დამატებით აცხობენ, სანამ კვერცხი ბოლომდე არ გამაგრდება.ეს ნავის ფორმის ღვეზელი აჭარის სანაპირო რეგიონიდან მოდის და როგორც წესი, მას ზემოდან, გამღვალ კარაქის ნაჭერთან ერთად მიირთმევენ“ - წერს Tasteatlas-ი.აღსანიშნავია, რომ ათეულში მეშვიდე ადგილზე ხაჭაპური იმყოფება, მე-13 და მე16 ადგილებს მეგრული და ფენოვანი ხაჭაპურები, ხოლო 26-ე ადგილს გურული, 34-ე ადგილს იმერული, ხოლო 38 ადგილს - სვანური ხაჭაპური იკავებს, 58-ე პოზიციაზეა ოსური, 69-ზე ნადუღი, ხოლო 82-ზე გებჟალია.ყველის საუკეთესო კერძების ტოპ-10 ასე გამოიყურება: 1. საგანაკი - საბერძნეთი; 2. აჭარული ხაჭაპური - საქართველო; 3. პროვოლეტა - არგენტინა; 4. სირნიცა - ბოსნია და ჰერცოგოვინა; 5. ფოკაჩა - იტალია; 6. შაჰი პანირი - ინდოეთი; 7. ხაჭაპური - საქართველო; 8. ბანიცა - ბულგარეთი; 9. კასპატცლნი - ავსტრია; 10. ფონდიუ ჟურასიენი - საფრანგეთი.

ავსტრიულ სტარტაპ NOSI–ს, ვენის ტექნოლოგიურ უნივერსიტეტთან ერთად, სურთ სმარტფონებს სუნის ამოცნობა ასწავლონ. მომავალში, ტელეფონებს შეეძლებათ მათი გარჩევა — მაგალითად, გაფუჭებული საკვების შესახებ შეტყობინების ან დაავადების იდენტიფიცირების გაკეთება ექიმის მიერ დიაგნოზის დასმამდე.ადამიანის ცხვირში დაახლოებით 350 ტიპის ყნოსვითი რეცეპტორია, რომლებიც საშუალებას გვაძლევს განვასხვაოთ ათიათასობით სუნი, ახალი პურიდან დაწყებული ბენზინით დამთავრებული. ასეთი რთული ბუნებრივი სისტემის ტექნოლოგიების გამოყენებით რეპროდუცირება ჯერ კიდევ შეუძლებელია, მაგრამ თუ NOSI-ს „ხელოვნური ცხვირის“ შექმნის მცდელობები წარმატებული იქნება, სიტუაცია შესაძლოა მალე შეიცვალოს.ამჟამად ტესტირების პროცესშია სმარტფონის პროტოტიპი, რომელსაც აქვს სუნის ანალიზის სენსორი. ნიმუშის მისაღებად, სუნის წყაროსთან ახლოს ათავსებენ სპეციალურ ადაპტერს და აჭერენ ღილაკს, რის შემდეგაც პატარა ვენტილატორი ჰაერს და მასში შემავალ მოლეკულებს იწოვს - ადამიანის ჩასუნთქვის მსგავსად.ამ ეტაპზე სენსორი საკმაოდ დიდი რჩება და სმარტფონზე ცალკეა მიმაგრებული, თუმცა შემდეგ ეტაპზე გუნდი მის შემცირებას გეგმავს, რათა მოწყობილობა პირდაპირ მოწყობილობაში ინტეგრირდეს.ვრცლად euro-pulse – ზე

დონალდ ტრამპის ადმინისტრაცია 200 000-მდე უცხოელისთვის ბიზნეს და ტურისტული ვიზების გაუქმებას განიხილავს, – ამის შესახებ ინფორმაციას „ესოშიეითიდ პრესი“ ავრცელებს.საუბარია 2016-2026 წლებში გაცემულ ვიზებზე, რომელთა მფლობელებმაც აშშ-ში თავშესაფრის მიღებაზე განაცხადი შეიტანეს ან ამჟამად ითხოვენ თავშესაფარს. აღნიშნულის შესახებ ინფორმაციას ოფიციალური პირები ანონიმურობის პირობით ავრცელებენ, რადგან გადაწყვეტილება საბოლოოდ ჯერ მიღებული არ არის.აღნიშნულის შესახებ განცხადება გაავრცელა აშშ-ის სახელმწიფო დეპარტამენტის სპიკერმა, ტომი პიგოტმა. პიგოტმა უარი თქვა იმ ადამიანების ზუსტი რაოდენობის დასახელებაზე, რომელთა ვიზებიც, შესაძლოა, გაუქმდეს, თუმცა აღნიშნა, რომ კოორდინაციაში არიან აშშ-ის საშინაო უსაფრთხოების დეპარტამენტთან.„ჩვენ ვთანამშრომლობთ აშშ-ის საშინაო უსაფრთხოების დეპარტამენტთან, რათა გამოვავლინოთ და გავაუქმოთ იმ უცხოელთა არასაიმიგრაციო ვიზები, რომლებიც შეერთებულ შტატებში მოკლევადიანი ვიზიტორების სტატუსით ჩამოვიდნენ, თუმცა შემდეგ თავშესაფრის მოთხოვნა შეიტანეს, რათა ქვეყანაში მუდმივად დარჩნენ. ეს პროცესი გაგრძელდება, გაუქმებული ვიზების რაოდენობა დინამიკურია და გადაწყვეტილებები ეტაპობრივად მიიღება“, – განაცხადა პიგოტმა.ამასთან, ოფიციალური პირების განცხადებით, ვიზების გაუქმება ავტომატურად არ ნიშნავს ამ ადამიანების დაუყოვნებლივ დეპორტაციას.მანამდე აშშ-ის სახელმწიფო მდივნის მოადგილემ, კრისტოფერ ლანდაუმ სოციალურ ქსელში დაწერა, რომ აშშ-ის საიმიგრაციო სისტემა დიდი ხნის განმავლობაში თავშესაფრის მოთხოვნებით გადატვირთული იყო.როგორც „ესოშიეითიდ პრესი“ წერს, ბოლო 18 თვის განმავლობაში აშშ-ის სახელმწიფო დეპარტამენტმა დაახლოებით 175 000 ვიზა გაუუქმა იმ ადამიანებს, რომლებიც სხვადასხვა დანაშაულში იყვნენ მსჯავრდებული ან ბრალდებული, მათ შორის ნასვამ მდგომარეობაში ავტომობილის მართვაში, გაუპატიურებასა და ძარცვაში. ვიზები ასევე გაუუქმეს ადამიანებს, რომლებიც საჯაროდ აკრიტიკებდნენ აშშ-ის პოლიტიკას, განსაკუთრებით ახლო აღმოსავლეთთან დაკავშირებულ საკითხებზე.წყარო: პირველი არხი

რუსეთში უარესისთვის ემზადებიან: ხალხს ბანკებიდან მილიარდობით რუბლი გააქვს, ცხოვრების გაუარესებას ელის და ქვეყნის დატოვებაზე ფიქრობს. ეს პესიმიზმი ზრდის საბიუჯეტო დეფიციტსაც, რომლის შესავსებად კრემლს შესაძლოა ფულის საბეჭდი მანქანის ამუშავება დასჭირდეს.რუსეთში ბოლო კვირების განმავლობაში მკვეთრად გაიზარდა საზოგადოების პესიმიზმი - როგორც ომთან, ისე ზოგადად, საკუთარი ცხოვრების პერსპექტივასთან დაკავშირებით.რუსეთში მთავრობისადმი ლოიალური საზოგადოებრივი აზრის კვლევის სახელმწიფო ცენტრის, ВЦИОМ-ის გამოკითხვამაც კი აჩვენა, რომ 2026 წლის ივლისში რუსეთის იმ მოქალაქეების წილი, რომლებიც ფიქრობენ, რომ ყველაზე მძიმე დროება ჯერ კიდევ წინ აქვთ, 66%-მდე გაიზარდა, რაც 2020 წლის აპრილის შემდეგ ყველაზე მაღალი მაჩვენებელია. 12%-მა პირდაპირ თქვა, რომ რუსეთი „კრიზისს განიცდის“.ВЦИОМ რამდენიმე თვეა განწყობების გაუარესების ტენდენციას აფიქსირებს. 2026 წლის მაისში გამოკითხულთა 60% აცხადებდა, რომ ყველაზე მძიმე დრო ჯერ კიდევ წინ ჰქონდათ. ივნისში ასე ფიქრობდა 63% ივლისში კი - 66% 2025 წლის მარტში, განწყობები გაცილებით მშვიდი იყო: მაშინ ვითარების გაუარესებას გამოკითხულთა მხოლოდ 39% ელოდა. რუსეთის მოქალაქეების პესიმიზმი არ უკავშირდება მხოლოდ უკრაინის ფრონტზე მიმდინარე მოვლენებს და უკრაინული დრონების მიერ რუსეთის სიღრმეში მიმდინარე დარტყმებს, რომელთა შედეგებიც რუსეთის თითქმის ყველა რეგიონის მოსახლეობამ საკუთარ თავზე გამოცადა. ექსპერტთა თქმით, ცვლილება დაკავშირებულია იმასთან, თუ როგორ რეაგირებს უკრაინის იერიშებზე მათი ქვეყნის მთავრობა. კრემლმა არაერთხელ განაცხადა, რომ აპირებს ომის გაგრძელებას ბიუჯეტთან დაკავშირებული პრობლემების, ომით გამოწვეული ბიზნესდანაკარგებისა და ნავთობგადამამუშავებელ ქარხნებზე იერიშების შედეგად წარმოქმნილი საწვავის დეფიციტის მიუხედავად.რუსეთის მოქალაქეები აცნობიერებენ იმასაც, რომ ომის გაგრძელებას ფული სჭირდება და ისინი უკვე საკუთარ თავზე გრძნობენ გადასახადების ზრდას, ფასების მატებას, სოციალური დახმარებების შემცირებასა და, ზოგადად, ცხოვრების ხარისხის გაუარესებას.Gallup-ის ბოლო გამოკითხვის მონაცემებით, ბოლო პერიოდში ცხოვრების ხარისხის გაუარესების შესახებ განაცხადა რუსეთის მოქალაქეების 56%-მა, რაც ერთი წლის წინანდელ მაჩვენებელზე 13 პროცენტული პუნქტით, ხოლო 2022 წლის მაჩვენებელზე 22 პროცენტული პუნქტით მეტია. დღეს რუსების 60% მიიჩნევს, რომ ქვეყანაში ეკონომიკური მდგომარეობაც უარესდება. ამგვარმა ნეგატიურმა მოლოდინებმა უკვე გამოიწვია ფულის მასობრივი გადინება რუსეთის ბანკებიდან.ბანკებიდან ფული გაედინებარუსეთის ცენტრალური ბანკის მონაცემებით, 2026 წლის დასაწყისიდან რუსეთის საბანკო სისტემიდან, 2 ტრლნ რუბლი (24,1 მლრდ დოლარი) ნაღდი ფული გაიტანეს. ცენტრალურმა ბანკმა რეკორდული გადინება დააფიქსირა 2026 წლის ივლისში. ხალხმა ბანკებიდან ნაღდი ფულის გატანა უკრაინის შეიარაღებული ძალების მიერ ნავთობგადამამუშავებელ ქარხნებსა და Wildberries-ის საწყობებზე დარტყმების შემდეგ დაიწყო.რუსული ფინანსური მარკეტპლეისის საბანკო ანგარიშგების მიხედვით, ბოლო თვეების განმავლობაში რუსეთის უმსხვილეს ბანკებში მნიშვნელოვნად შემცირდა ფიზიკური პირების სახსრების მოცულობა. სერვის Банки.ру-ს მონაცემებით, რუსეთში ნაღდ ფულზე მოთხოვნა მარტის დასაწყისში გაიზარდა და მას შემდეგ მხოლოდ მატულობს და მატულობს. ყოველთვიურად ანგარიშებიდან დაახლოებით 300 მილიარდი რუბლი (3,05 მილიარდი ევრო) გააქვთ. ნაღდი ფულის გადინების პრობლემას შეეჯახა რუსეთის შვიდი უმსხვილესი საკრედიტო ორგანიზაციიდან ხუთი, რომლებშიც რუსეთის მოქალაქეებს 1 ტრილიონ რუბლზე მეტი (10,15 მლრდ ევრო) ჰქონდათ შენახული.ანგარიშებიდან ნაღდი ფულის გატანით ანტირეკორდსმენია „გაზპრომბანკი“, საიდანაც ოთხი თვის განმავლობაში მეანაბრეებმა 299,5 მილიარდი რუბლი (3,04 მილიარდი ევრო), ანუ ყველა დეპოზიტის 10,8%, გაიტანეს. ამავე პერიოდში „როსსელხოზბანკში“ დაცული სახსრები 270,5 მილიარდი რუბლით (2,75 მილიარდი ევრო), ანუ 15%-ით შემცირდა. რუსეთის უმსხვილესმა კერძო ბანკმა, „ალფა-ბანკმა“ დაკარგა 179,4 მილიარდი რუბლის (1,82 მილიარდი ევრო) სახსრები (5,6%) „სოვკომბანკმა“ 81,7 მილიარდი რუბლი (830 მილიონი ევრო), ანუ 8,1%, ხოლო VTB-მ - 20,4 მილიარდი რუბლი (207 მილიონი ევრო), ანუ 0,24%. „სბერბანკში“ დეპოზიტების მოცულობა თავდაპირველად იზრდებოდა, თუმცა ბოლო თვეებში იქიდანაც დაიწყო ნაღდი ფულის გატანა: ივნისში 211,6 მილიარდი რუბლი (2,15 მილიარდი ევრო), ივლისში კი - 31,8 მილიარდი რუბლი (323 მილიონი ევრო).Банки.ру-ს სტატისტიკის მიხედვით, ფულის გადინებამ მხოლოდ T-Bank-ს აუარა გვერდი. ამ ბანკში დეპოზიტების მოცულობა 193 მილიარდი რუბლით (1,96 მილიარდი ევრო), ანუ 6,9%-ით გაიზარდა.რუსეთის ცენტრალური ბანკის მონაცემებით, 2026 წლის ივლისში მიმოქცევაში არსებული ნაღდი ფულის საერთო მოცულობა 643,4 მილიარდი რუბლით (6,53 მილიარდი ევრო) გაიზარდა, რაც 2026 წლის დასაწყისიდან ყველაზე დიდი ყოველთვიური მატებაა. ბანკის მონაცემებითვე, 2026 წლის დასაწყისიდან რუსეთის საბანკო სისტემიდან ნაღდი ფულის მასაში მთლიანობაში 2,4 ტრილიონი რუბლი (24,4 მილიარდი ევრო) გადავიდა. აგვისტოს პირველ ნახევარში რუსეთის ბანკებიდან გაიტანეს კიდევ 300 მილიარდი რუბლი, ანუ დაახლოებით 3 მილიარდი ევრო.„ [ბანკები] ამას არ ელოდნენ, ეს ნაღდი ფული სადღაც ჰქონდათ დაბანდებული, ახლა კი ადამიანები მიდიან და თვეში ნახევარი ტრილიონი რუბლი გააქვთ“, - უთხრა რუსეთის ფინანსურ სისტემასთან დაკავშირებულმა ყოფილმა ჩინოვნიკმა გამოცემა The Washington Post-ს.ანალიტიკოსების აზრით, ნაღდი ფულის მასობრივი გატანა ასახავს რუსების მზარდ უნდობლობას საბანკო სისტემის მიმართ, რაც უკრაინის იერიშებითა და გაღრმავებული ეკონომიკური კრიზისით არის გამოწვეული. უკრაინული დრონების დარტყმებმა ნავთობგადამამუშავებელ ქარხნებზე რუსეთში ნავთობის გადამუშავების მოცულობა 30%-ით შეამცირა.„დაფრინავენ დრონები. ირგვლივ ყველაფერი იწვის. დაძაბულობა იზრდება. და შესაძლოა, ადამიანები აცნობიერებენ, რომ ნაღდი ფული ბალიშის ქვეშ უნდა შეინახონ და არა ბანკებში, საიდანაც, შესაძლოა, მას ვეღარასოდეს დაიბრუნონ“, - უთხრა Washington Post-ს ყოფილმა რუსმა ჩინოვნიკმა, რომელმაც ანონიმურად დარჩენა ისურვა.ამუშავდება ფულის საბეჭდი მანქანა?ეკონომისტების პროგნოზით, ნაღდი ფულის მასის ზრდა გამოიწვევს ინფლაციის მატებას და ისედაც მძიმე ვითარებაში მყოფი რუსეთის ეკონომიკის მდგომარეობის გაუარესებას.რუსეთის ცენტრალურმა ბანკმა, ცოტა ხნის წინ, საშუალოვადიანი მაკროეკონომიკური პროგნოზი განაახლა და წლის შედეგების მიხედვით ინფლაციის საკუთარი პროგნოზი 4,5%-დან 7%-მდე გაზარდა. გარდა ამისა, ცენტრალური ბანკის განახლებულ პროგნოზში ბიუჯეტის დეფიციტიც გაიზარდა მშპ-ის 2%-ით, ანუ დაახლოებით 4,5 ტრილიონი რუბლით. რუსეთის 2026 წლის ბიუჯეტის შესახებ კანონით გათვალისწინებულ 3,8 ტრილიონ რუბლთან ერთად, რუსეთის ბიუჯეტის ჯამურმა დეფიციტმა 8,3 ტრილიონი რუბლი (დაახლოებით 100 მლრდ დოლარს) შეადგინა.რა შეიძლება იყოს რეკორდული საბიუჯეტო დეფიციტის დაფინანსებისთვის საჭირო სახსრების წყარო? ექსპერტთა შეფასებით, საკითხი სულაც არ არის უმნიშვნელო, თუ გავითვალისწინებთ იმას, რომ რუსეთის ფინანსთა სამინისტროს გაურკვეველი ვადით მოუწია ფედერალური სასესხო ობლიგაციების განთავსების აუქციონების გაუქმება.როგორც რადიო თავისუფლების რუსული რედაქციის ეკონომიკური მიმომხილველი მაქსიმ ბლანტი ამბობს, დაფინანსების წყაროსთან დაკავშირებულ კითხვაზე პასუხი ზედაპირზევე დევს: რუსეთის ფინანსთა სამინისტრომ ახლახან დაარეგისტრირა მცურავი კუპონით გათვალისწინებული ფედერალური სასესხო ობლიგაციების ორი გამოშვება, საერთო ჯამში 1,5 ტრილიონი რუბლის მოცულობით, რომელთა დაფარვის ვადად 2037 და 2042 წლებია განსაზღვრული, ხოლო ობლიგაციებს სახელმწიფო ბანკები შეისყიდიან.“თუ საიდან მოიპოვებენ სახელმწიფო ბანკები ამისთვის საჭირო თანხას, ამის გამოცნობა რთული არ არის, - ამბობს მაქსიმ ბლანტი, - რუსეთის ფედერაციაში ემისიის ცენტრი მხოლოდ ერთია. სწორედ ის გამოუშვებს, ანუ მარტივად რომ ვთქვათ, დაბეჭდავს რუბლებს”.მიგრაციის ახალი ტალღარუსეთის მოქალაქეების განწყობაზე, ეკონომიკური სახის პრობლემების გარდა, ნეგატიურ გავლენას ასევე ახდენს შფოთვა 2026 წლის შემოდგომაზე (საპარლამენტო არჩევნების დასრულების შემდეგ) ახალი მობილიზაციის შესაძლო გამოცხადების გამო. შედეგად ბოლო თვეებში გაიზარდა იმ ადამიანების ნაკადი, რომლებიც რუსეთს ტოვებენ როგორც დროებით, ისე სამუდამოდ.2026 წლის ზაფხულში უფლებადამცველი ორგანიზაციები («Ковчег»), სერვისები და სოციოლოგები რუსეთიდან ემიგრაციის ინტერესის მკვეთრ ზრდას და ახალ ტალღას ადასტურებენ. The Moscow Times-ის მონაცემებით, ქვეყნის დატოვებასთან და უვიზო მიმართულებებთან დაკავშირებული ინფორმაციის ძიების მოთხოვნები 2022 წლის შემოდგომის მობილიზაციის მაჩვენებლებს გაუტოლდა. ამის მთავარი მიზეზებია: ახალი მობილიზაციის შიში დაღლილობა და უპერსპექტივობა - გაჭიანურებული ომის პირობებში ცხოვრებით გამოწვეული ზოგადი ფსიქოლოგიური დაღლილობა და ქვეყნის შიგნით გრძელვადიანი დაგეგმვის შეუძლებლობა. უსაფრთხოების რისკები - მზარდი შიდა პოლიტიკური რეპრესიები და სამოქალაქო თავისუფლების შეზღუდვა. 2022 წლის პირველი, ქაოსური ტალღისგან განსხვავებით, როდესაც ადამიანები ხშირად მხოლოდ ზურგჩანთებით გარბოდნენ, ახლა რუსეთიდან წასვლას უფრო გააზრებული ხასიათი აქვს. ადამიანები ყიდიან უძრავ ქონებას, ხურავენ ბიზნესს და ემზადებიან ხანგრძლივი ან სამუდამო ემიგრაციისთვის.ემიგრაციის ძირითადი მიმართულებებია უვიზო ქვეყნები (რუსეთის ე.წ. ახლო სამეზობლო). საქართველო, სომხეთი და სერბეთი კვლავ ლიდერობენ მარტივი შესვლის, პირველადი ლეგალიზაციისა და უკვე არსებული რუსულენოვანი თემების გამო.საგრძნობლად იმატა რუსი მიგრანტების ინტერესმა დასავლური სანქციებისგან შორს მყოფი ქვეყნების - არგენტინისა და ბრაზილიის მიმართ.„ომის დაწყება რუსებისთვის შოკი იყო. შემდეგ ადაპტაციის პერიოდი დადგა, ისინი ომს შეეგუვნენ. ახლა კი მათში მომავლის ჰორიზონტის ნგრევის პროცესი მიმდინარეობს. ადამიანები ამბობენ: შემდეგ უარესი იქნება, და თავადაც უარესისთვის ემზადებიან“, - ამბობს რუსი სოციოლოგი და პოლიტოლოგი დმიტრი დუბროვსკი.დუბროვსკის თქმით, როდესაც რუსეთში ადამიანები მომავალზე საუბრობენ, სინამდვილეში, ისინი პირდაპირ არც ომს გულისხმობენ და არც საერთაშორისო პოლიტიკას, თუმცა ომის მიმდინარეობის ეფექტიანობას ისინი საკმაოდ დაბალ შეფასებას აძლევენ.„როგორც ჩანს, ომი სულ უფრო მეტად ანგრევს წარმოდგენას იმაზე, საერთოდ რა ხდება რუსეთში დღეს და რამდენად ნორმალურია ვითარება. მაგრამ მთავარი ის არის, რომ ეს განწყობები შეიძლება რუსების მომავლის ჰორიზონტის ნგრევად გავიგოთ. ანუ ადამიანები უკვე ამბობენ, რომ მომავალში უარესი იქნება”.რუსი სოციოლოგი და პოლიტოლოგი დმიტრი დუბროვსკიდმიტრი დუბროვსკი რადიო თავისუფლების პროექტ The CurrentTimes-თან საუბარში იხსენებს საბჭოთა ანეკდოტს, რომლის მიხედვითაც ოპტიმისტსა და პესიმისტს შორის განსხვავება ისაა, რომ პესიმისტი ამბობს: „ამაზე უარესი უკვე აღარ იქნება“, ხოლო ოპტიმისტი პასუხობს: „როგორ არა, წინ უარესი გველისო“.“ასე რომ, ვფიქრობ, დღეს რუსეთის მოქალაქეების უმრავლესობა სწორედ ასეთი „ოპტიმისტია“, რომელიც ამბობს, რომ მომავალი ნამდვილად უარესი იქნება”, - ამბობს სოციოლოგი, რომლის თქმითაც, სოციალური კეთილდღეობა და ადამიანების ფსიქოლოგიური მდგომარეობა ისეა მოწყობილი, რომ თუ ადამიანი უკვე ემზადება უარესისთვის, გარკვეული გაგებით, მოქმედებას იწყებს თვითაღსრულებადი წინასწარმეტყველება:„რუსეთში ადამიანები უკვე უარესისთვის ემზადებიან და სრულიად სხვაგვარად იქცევიან. ისინი აღარ გეგმავენ გრძელვადიან ინვესტიციებს, გრძელვადიან პროექტებს, აღარ აბანდებენ ფულს ხანგრძლივი ვადით, რადგან იციან, რომ მომავალში უარესი იქნება. სწორედ ამიტომაც გააქვთ ფული ბანკებიდან. ყოველივე ეს ერთად მიანიშნებს, რომ ადამიანები უარესისთვის ემზადებიან. და როგორ ემზადებიან რუსები უარესისთვის? როგორც ყოველთვის: გამოაქვთ ფული, ყიდულობენ მარილს, ასანთს და შაქარს“.რა შეიძლება მოჰყვეს ამ „ნორმალურობის ეროზიას“? - ამ კითხვის პასუხად დმიტრი დუბროვსკი ამბობს:„ზოგმა შეიძლება გადაწყვიტოს, რომ წასვლის დროა, და ჩვენ ვხედავთ, რომ გაიზარდა ხალხის ნაკადი ზემო ლარსის მიმართულებით - რუსეთ-საქართველოს საზღვრის გამშვები პუნქტისკენ. როგორც ჩანს, ესეც იმ გადაწყვეტილებების ნაწილია, რომლებიც სწორედ ასეთი განწყობისა და მომავლის შიშის ფონზე მიიღეს. ვიღაც ფულის გამოტანას იწყებს, ვიღაც კი TikTok-ზე ვიდეოებს იღებს და ამბობს, რომ „მოგზაურობა სწორედ ახლა უნდა დაგეგმონ“, რადგან შემოდგომაზე ამისთვის „აღარ ეცლებათ“. ადამიანები ემზადებიან. ემზადებიან ისე, როგორც უარესისთვის უნდა ემზადებოდნენ“.წყარო: www.radiotavisupleba.ge