ახალი კვლევის თანახმად, კვირაში სამჯერ ან მეტჯერ ჩაის სმა სისხლძარღვთა დაავადებების — მაგალითად, ინსულტისა თუ გულის შეტევის — რისკის 11%-ით შემცირებას უკავშირდება. თუმცა, ძალიან ცხელი ჩაის მიღებას საპირისპირო შედეგი მოჰყვება: სისხლძარღვთა დაავადებების რისკი 16%-ით იზრდება.ახალი კვლევის თანახმად, ჩაის რეგულარული სმა დაკავშირებულია სისხლძარღვთა დაავადებების — მაგალითად, ინსულტის, გულის კორონარული დაავადებისა და გულის შეტევის — განვითარების უფრო დაბალ რისკთან.ჩაი მზადდება Camellia sinensis-ის — აღმოსავლეთ აზიიდან წარმოშობილი მარადმწვანე ბუჩქის — დამუშავებული ფოთლების დაყენებით. ყველა სახეობა, მათ შორის თეთრი, მწვანე, ულუნგი, შავი და პუ-ერი, ერთი და იმავე მცენარისგან მიიღება; მათი განსხვავებული გემო კი იმით განისაზღვრება, თუ რამდენად გადიან ისინი ჟანგვის პროცესს. ეს სასმელი მრავალ კულტურაში რაციონის ჩვეული ნაწილია. ინგლისური საუზმიდან დაწყებული, ჩინური ჩაის ცერემონიებით დამთავრებული, ის მსოფლიოს მილიონობით ადამიანის ყოველდღიურ ცხოვრებაშია წარმოდგენილი.ჟურნალ Journal of Internal Medicine-ში გამოქვეყნებული კვლევის თანახმად, ჩაიში შემავალ ბიოაქტიურ ნაერთებს — მათ შორის პოლიფენოლებსა და ფლავონოიდებს — გააჩნიათ ანტიოქსიდანტური, ანთების საწინააღმდეგო და ენდოთელიუმის დამცავი თვისებები. ისინი იცავენ სისხლძარღვების შიდა შრეს და ხელს უწყობენ სისხლის ჯანსაღ მიმოქცევას, რაც, თავის მხრივ, სისხლძარღვთა დაავადებების პრევენციაში გვეხმარება.მკვლევრები თითქმის 500 000 ჩინელს საშუალოდ ცხრა წლის განმავლობაში აკვირდებოდნენ; ისინი აღრიცხავდნენ ჩაის მოხმარების სიხშირეს და იმ დაავადებებს, რომლებიც ამ პერიოდში მონაწილეებს განუვითარდათ. აღმოჩნდა, რომ მათ, ვინც ჩაის რეგულარულად — კვირაში სამჯერ ან მეტჯერ — სვამდა, სისხლძარღვთა დაავადებების განვითარების საერთო რისკი 11,2%-ით ნაკლები ჰქონდათ. ყველაზე მკაფიო კავშირი გამოვლინდა იშემიურ ინსულტთან — რისკი 36,6%-ით შემცირდა; მას მოსდევს თავის ტვინის სისხლძარღვთა დაავადებები, სადაც შემცირების მაჩვენებელი 19,1%-ს შეადგენს.მკვლევრებმა დაადგინეს, რომ დამცავი კავშირები მნიშვნელოვნად განსხვავდებოდა იმის მიხედვით, თუ როგორ მზადდებოდა და როგორ მიირთმეოდა ჩაი. მონაწილეებს შორის მოხმარების მედიანური მაჩვენებელი დღეში ორ-სამ ფინჯანს შეადგენდა; თუმცა, რისკის ყველაზე დაბალი დონე იმ პირებში აღინიშნა, რომლებიც დღეში ექვსიდან რვა ფინჯანამდე სვამდნენ.სისხლძარღვთა დაავადებებთან ყველაზე მყარი და თანმიმდევრული კავშირი შავმა ჩაიმ გამოავლინა; მას მოსდევს მწვანე ჩაი. მკვლევრები ამას ფერმენტაციის შედეგად წარმოქმნილ ნაერთებს, მაგალითად, თეაფლავინებს უკავშირებენ, რომლებსაც ანთების საწინააღმდეგო და ლიპიდების მარეგულირებელი თვისებები გააჩნიათ.მნიშვნელობა ჰქონდა ასევე ჩაის ტემპერატურასა და სიძლიერეს. მკვლევრებმა დაადგინეს, რომ საუკეთესო ვარიანტი ზომიერად ძლიერი და ისეთი ჩაი იყო, რომელიც არ წვავდა.გასაკვირია, რომ ძალიან ცხელი ჩაი საპირისპირო შედეგთან — სისხლძარღვთა დაავადებების რისკის 16%-იან ზრდასთან — აღმოჩნდა დაკავშირებული. მანამდეც იყო ცნობილი, რომ ძალიან ცხელი სასმელები საყლაპავის კიბოს განვითარების უფრო მაღალ ალბათობასთან არის დაკავშირებული.ვრცლად: euronews – ზე

ქვეყანაში არის 500 ათასი ადამიანი, რომელსაც ერთხელაც არ მიუმართავს ცე ჰეპატიტის სკრინინგის ჩასატარებლად.ამის შესახებ დაავადებათა კონტროლის ცენტრის დირექტორის მოადგილემ ეკა ადამიამ განაცხადა. გარდა ამისა, მისივე თქმით, 36 ათასამდეა ისეთი პაციენტი, რომლებსაც ან დასმული აქვთ დიაგნოზი და არ იტარებენ მკურნალობას, ან მკურნალობის პროცესი შუა გზაზე აქვთ შეწყვეტილი. ეკა ადამიას განცხადებით, მიმდინარეობს მუშაობა, რომ ეს ადამიანები დაუბრუნდნენ პროგრამას.„მკურნალობაში 94 ათასზე მეტი ადამიანია ჩართული, რაც ძალიან მაღალი მაჩვენებელია. პირველი რიგის სამიზნე სწორედ ამ ადამიანების მოზიდვაა. იმდენად ხელმისაწვდომია ეს მკურნალობა, რომ ცე ჰეპატიტიანი პაციენტი არ უნდა დაგვრჩეს. არანაკლები გამოწვევაა ბე ჰეპატიტი, რომლითაც საქართველოში 80 ათასი ადამიანია დაავადებული და 25 ათასს ესაჭიროება მკურნალობა,“ - განაცხადა ეკა ადამიამ.მისი თქმით, ბე ჰეპატიტით ინფიცირებულ ყველა პაციენტს არ ესაჭიროება მკურნალობა და მათი ნაწილი მხოლოდ ყოველწლიურ მონიტორინგსა და კვლევებს საჭიროებს, რომლებიც ასევე უფასოა. შეგახსენებთ,  რომ ცე ჰეპატიტის პროგრამა საქართველოში 2015 წლიდან, ბე ჰეპატიტის პროგრამა კი 2024 წლიდან ხორციელდება.ასევე შეგახსენებთ, რომ საქართველო B და C ჰეპატიტების ელიმინაციის მიმართულებით ოქროს დონის საერთაშორისო აღიარებისთვის ემზადება. ჯანდაცვის სამინისტროს ინფორმაციით, ქვეყანას გააჩნია ყველა ძირითადი წინაპირობა, რომ გახდეს ერთ-ერთი პირველი სახელმწიფო მსოფლიოში, რომელიც ჯანმრთელობის მსოფლიო ორგანიზაციის მიერ მიიღებს ვირუსული ჰეპატიტების ელიმინაციის მაღალი - ოქროს დონის (Gold Tier) საერთაშორისო აღიარებას.jandacva.ge

აშშ-ში ექიმები მოსახლეობას გრიპის საწინააღმდეგო ვაქცინაციისკენ მოუწოდებენ. შეშფოთების მიზეზია გრიპის შემთხვევების უჩვეულოდ ადრეული მატება ქვეყნის დასავლეთ სანაპიროზე და ვირუსის ახალი მუტაცია, რომელმაც შესაძლოა ახალგაზრდებში იმუნური დაცვის ეფექტიანობა შეამციროს.ამის შესახებ Reuters-ი წერს და აღნიშნავს, რომ ამ სეზონზე გავრცელებულ გრიპის ძირითად შტამად H1N1 სახელდება. ეს ის ვირუსია, რომელმაც 2009 წელს „ღორის გრიპის“ პანდემია გამოიწვია და რომელიც დღეს გრიპის საწინააღმდეგო ვაქცინების შემადგენლობაში შედის. თუმცა, წელს გავრცელებულ ვირუსში გამოვლინდა ახალი მუტაცია — G155E.მეცნიერების ვარაუდით, ადამიანები, რომლებსაც H1N1 ადრე გადატანილი აქვთ ან მის წინააღმდეგ აცრილები არიან, შესაძლოა ძველი ვარიანტების მიმართ გარკვეულ დაცვას ინარჩუნებდნენ, მაგრამ ეს დაცვა ახალ მუტაციაზე ნაკლებად ეფექტიანი აღმოჩნდეს.ნიუ-იორკის Mount Sinai Children's Hospital-ის ბავშვთა ინფექციონისტი ჯენიფერ დუშონი აღნიშნავს, რომ ახალგაზრდების ნაწილს ამ კონკრეტულ ვარიანტთან შეხება ადრე არ ჰქონია, ამიტომ მათში დაავადება შესაძლოა უფრო მძიმედ მიმდინარეობდეს.რაც შეეხება ვაქცინებს, 2026–2027 წლების გრიპის საწინააღმდეგო ვაქცინები, რომლებიც აშშ-ის სურსათისა და მედიკამენტების ადმინისტრაციამ (FDA) აგვისტოში დაამტკიცა, სამი კომპონენტის წინააღმდეგ არის მიმართული. ესენია H1N1,  H3N2 და გრიპის B ვირუსის ერთ-ერთი ვარიანტი.პენსილვანიის უნივერსიტეტის მიკრობიოლოგის, სკოტ ჰენსლის შეფასებით, ვაქცინის სამი კომპონენტიდან ორი კარგად შეესაბამება ამჟამად გავრცელებულ ვირუსებს. მიუხედავად ამისა, H1N1-ის ახალმა მუტაციამ შესაძლოა განსაკუთრებით ახალგაზრდებში ანტისხეულების ეფექტიანობაზე იმოქმედოს. ამ ფონზე, სპეციალისტები გრიპის სეზონის ვაქცინაციის დროულად ჩატარებას კიდევ უფრო მიზანშეწონილად მიიჩნევენ.ამერიკის სამედიცინო ასოციაცია გრიპის საწინააღმდეგო აცრას ექვსი თვის ასაკიდან ყველა ადამიანისთვის უწევს რეკომენდაციას. გრიპი განსაკუთრებით საშიში შეიძლება იყოს ჩვილებისა და იმ ადამიანებისთვის, რომლებსაც ჯანმრთელობის თანმხლები პრობლემები აქვთ.ბოლო ათი წლის განმავლობაში გრიპის ვაქცინის ეფექტიანობა გრიპით გამოწვეული ჰოსპიტალიზაციისა და სიკვდილიანობის შემცირების თვალსაზრისით დაახლოებით 30–60%-ის ფარგლებში მერყეობდა.ინფექციური დაავადებების ამერიკული საზოგადოების ხელმძღვანელის, ჟან მარაცოს თქმით, გასულ წელს გრიპთან შეხებაში მყოფი ადამიანების ანტისხეულების კვლევებმა აჩვენა, რომ ისინი ახალ მუტაციას ყოველთვის ვერ ცნობდნენ. ეს განსაკუთრებით შესამჩნევი იყო მოზარდებისა და ახალგაზრდა ზრდასრულების შემთხვევაში.თუმცა, მკვლევრები ხაზს უსვამენ, რომ არსებული კვლევები მცირე მასშტაბისაა და მათი შედეგები პანიკის საფუძველს არ წარმოადგენს.jandacva.ge

21 ოქტომბრიდან ქვეყნის მასშტაბით სეზონური გრიპის საწინააღმდეგო ვაქცინაცია იწყება.დაავადებათა კონტროლის ცენტრის გენერალური დირექტორის ირაკლი ფურცელაძის განცხადებით ქვეყანამ 200 000 დოზა ფრანგული წარმოების, სამკომპონენტიანი , (SANOFI WINTHROP INDUSTRIE-ის Vaxigrip) სეზონური გრიპის საწინააღმდეგო ვაქცინა შეიძინა, რომელიც ერთ-ერთია ჯანმოს მიერ პრეკვალიფიცირებულ ვაქცინებს შორის. ვაქცინა ყველა მოქალაქისთვის უფასოა და სრულად ფინანსდება სახელმწიფოს მიერ.მისივე თქმით დღეს განთავსდება ინფორმაცია ვაქცინაციის სერვისის მიმწოდებელი სამედიცინო დაწესებულებებისა და პოლიკლინიკების შესახებ. მოქალაქეებს შეუძლიათ მიმართონ თავიანთ პოლიკლინიკას ან ახლომდებარე სამედიცინო დაწესებულებას, რომელიც იმუნიზაციის სახელმწიფო პროგრამაში მონაწილეობს. მნიშვნელოვანია აღვნიშნოთ, რომ ვაქცინაცია არ შემოიფარგლება თბილისით, მომსახურება გათვალისწინებულია რეგიონებშიც. გრიპის საწინააღმდეგო ვაქცინაცია რეკომენდებულია ყველა ადამიანისთვის 6 თვის ასაკიდან. თუმცა არსებობს ჯგუფები, რომელთათვისაც გრიპის მძიმე მიმდინარეობისა და გართულებების რისკი განსაკუთრებით მაღალია. პირველ რიგში, ესენი არიან: 60 წლის და უფროსი ასაკის პირები, ორსულები, 6 თვიდან 5 წლამდე ასაკის ბავშვები, ქრონიკული დაავადებების მქონე პირები, ონკოლოგიური პაციენტები, სამედიცინო პერსონალი, ასევე ხანდაზმულთა თავშესაფრებისა და პანსიონატების ბენეფიციარები და თანამშრომლები.ვაქცინაციის მსურველებმა აუცილებელია თან იქონიონ პირადობის დამადასტურებელი დოკუმენტი, რათა სამედიცინო დაწესებულებამ შეძლოს მათი მონაცემების იდენტიფიცირება და აცრის ელექტრონულ სისტემაში აღრიცხვა. სხვა დამატებითი საბუთის წარდგენა ან წინასწარი ჩაწერა საჭირო არ არის.ინფორმაციას ჯანდაცვის სამინისტრო ავრცელებს

რუსეთში "შავი ჭირის" შემთხვევამ გააჩინა კითხვები, რამდენად რეალურია საფრთხე და რა შეიძლება იდგეს ლაბორანტის გარდაცვალების უკან? საერთაშორისო ორგანიზაციები რუსულ მხარეს მეტი ინფორმაციის გავრცელებას სთხოვენ. ჯანდაცვის მსოფლიო ორგანიზაცია აცხადებს, რომ არსებული მონაცემებით რისკის სრულად შეფასება ჯერ ვერ ხერხდება, თუმცა ამ ეტაპზე ფართო გავრცელების ნიშნები არ იკვე­თება. ევროპის დაავადებათა კონტროლის ცენტრის შეფასებითაც, ამ დროისთვის არ არსებობს მეორადი შემთხვევების ან ადამიანიდან ადამიანზე გადაცემის მტკიცებულება.რუსეთმა უარყო ინფორმაცია მეორე შესაძლო შემთხვევის შესახებაც და განაცხადა, რომ ჩატარებული ათასობით ტესტით საშიში პათოგენების გავრცელება არ გამოვლენილა. მიუხედავად ამისა, კითხვები კვლავ არის - რა მოხდა სინამდვილეში ირკუტსკის ლაბორატორიაში და რა უნდა იცოდეს საზოგადოებამ ამ დაავადების შესახებ? - ამ კითხვებით მივმართეთ ინფექციონისტ ალექსანდრე გოგინავას.- რამდენად საფუძვლიანია შიში, რომ რუსეთში "შავი ჭირის" შესაძლო შემთხვევა ფართო ეპიდემიოლოგიურ საფრთხედ იქცეს? საფრთხე პრაქტიკულად ძალიან დაბალია. ჯანდაცვის მსოფლიო ორგანიზაციის შეფასებითაც საერთაშორისო გავრცელების რისკი ამ ეტაპზე ძალიან დაბალია, შესაბამისად, მას სპეციალური რეკომენდაციები არ გაუცია. თუმცა მეორე საკითხია, რომ არა გვაქვს სრული სურათი. ოფიციალურად, ლაბორატორიულად, არ დადასტურებულა, რომ ადამიანი "შავი ჭირით" გარდაიცვალა. ვიცით მხოლოდ ის, რომ მას ჰქონდა მძიმე მიმდინარეობის პნევ­მონია და მუშაობდა "შავი ჭირის" კვლევით ლაბორატორიაში. ასევე გავრცელდა ინფორმაცია მეორე ადამიანის გარდაცვალების შესახებაც, თუმცა ესეც არ დასტურდება. ჯანდაცვის მსოფლიო ორგანიზაცია და აშშ რუსეთისგან მეტ ინფორმაციას ითხოვენ და რეკომენდაციები მკაფიო სურათის შემდეგ გაიცემა. არის კითხვები, რატომ გავრცელდა ეს დაავადება. თუნდაც დავუშვათ, რომ მოხდა ტექნიკური დარღვევები ლაბორატორიაში, არსებობს სპეციალური პროტოკოლები, როგორ უნდა მოიქცეს ასეთ დროს ადამიანი, რომელსაც პირდაპირი ექსპოზიცია ჰქონდა ამ პათოგენთან. არსებობს ანტიბიოტიკები, რომლებიც ეფექტურია, თუ მათ პირველივე საათებში მიიღებენ. ამიტომ უცნაურია, რატომ ჰქონდა ლაბორატორიის თანამშრომელს პირდაპირი ექსპოზიცია მძიმე პათოგენთან და, მეორე მხრივ, რატომ არ დაიწყო დროულად პოსტექსპოზიციური მკურნალობა მის გადასარჩენად. შეიძლება საქმე არა "შავ ჭირთან", არამედ სრულიად სხვა შემთხვევასთან გვქონდეს.- არის ეჭვი, რომ შესაძლოა რუსეთი, როგორც ყოველთვის, ინფორმაციას მალავს. თუკი "შავი ჭირის" შემთხვევა დადასტურდება რა რისკების წინაშე დადგება ხალხი?- პრობლემური შემთხვევები ლაბო­რატო­რიებში აქამდეც ყოფილა როგო­რც სსრკ-ში, ისე შემდეგ რუსეთის ფედერაციაში. ამიტომაც იბადება კითხვა, რამდენად სრულფასოვანია ინფორმაცია, რომელსაც რუსეთი ავრცელებს. თუკი დავუშვებთ, რომ საქმე გვაქვს "შავი ჭირის" იმ შტამთან, რომელიც იწვევს ფილტვის დაზიანებას, და ის გავრცელდა (ანუ ერთი შემთხვევის გარდა, არის სხვებიც, რომლებიც არ არის იდენტიფიცირებული), არის რისკი, რომ გავრცელებამ ფართომასშტაბიანი ხასიათი მიიღოს.ხშირად ანალოგად ახსენებენ COVID-19-ს, რაც არასწორია, რადგან ის იყო ახალი ვირუსული ინფექცია, რომლის საწინააღმდეგოდაც სამკურნალო საშუალება არ არსებობდა. ვირუსული ინფექციის გავრცელების ტიპი სხვანაირია. "შავი ჭირის" პულმონურ ფორმას შეუძლია უფრო სწრაფად გავრცელება, ვიდრე დაავადების სხვა ფორმებს, მაგრამ ის ვერ გავრცელდება ისე სწრაფად, როგორც COVID-19 და სხვა ვირუსები. ვირუსული ინფექციის შემთხვევაში ადამიანი შეიძლება დაინფიცირდეს უფრო დიდ მანძილზეც. "შავი ჭირის" პულმონური ფორმის დროს დაინფიცირება შესაძლებელია, თუ მას აქვს ორ მეტრზე ახლო კონტაქტი და თუ იმ პირს უკვე გამოხატული აქვს სიმპტომები. "შავი ჭირის" გამომწვევი ბაქტერიის საწინააღმდეგოდ არსებობს ეფექტური ანტიბაქტერიული მკურნალობა, რაც იძლევა საშუალებას, დაავადების გამოვლენისთანავე დაიწყოს და კარგი შედეგიც მიიღონ. ყველაზე ცუდი სცენარით, შესაძლებელია დაავადება უფრო ფართომასშტაბიანად გავრცელდეს თვითონ რუსეთის ტერიტორიაზე და მეზობელ ქვეყნებშიც იყოს ერთეული შემთხვევები, მაგრამ ის, რომ ბაქტერიულმა ინფექციამ, თუნდაც ლაბორატორიულმა შტამმა, COVID-19-ის მსგავსი პანდემია გამოიწვიოს, პრაქტიკულად წარმოუდგენელია. ყველაზე ცუდი მოლოდინი ის არის, რომ შეიძლება ლოკალურად უფრო მეტ ადამიანს აღმოაჩნდეს და თუ დროულად ვერ მოხდება დიაგნოსტიკა, მძიმე მიმდინარეობა და მაღალი ლეტალობა ახასიათებს.- რა არის "შავი ჭირი"?- "შავი ჭირის" დაავადებას იწვევს ბაქტე­რია და უარყოფითი ჩხირი, რომელიც ერთ-ერთი ყველაზე საშიში ბაქტერიული აგენტია. ისტორიულად "შავი ჭირი" იყო ერთ-ერთი ვერაგი ინფექციური დაავადება, რომელიც მთელი ცივილიზაციების განადგურებას იწვევდა. თუმცა თანამედროვე ეპოქაში ანტიბიოტიკოთერაპიის დანერგვისა და ზედამხედველობის განვითარების შემდეგ დაახლოებით 50 წლის განმავლობაში "შავი ჭირის" მასობრივი აფეთქებები არ დაფიქსირებულა. იყო ეპიდემიოლოგიური ვითარების გაუარესება გარკვეულ ენდემურ კერებში, განსაკუთრებით აზიისა და აფრიკის კონტინენტებზე, მაგრამ გამომდინარე იქიდან, რომ არსებობს ეფექტური მკურნალობა, ის ადამიანისთვის ისეთ საფრთხეს ვეღარ ქმნიდა, როგორსაც წინა საუკუნეებში.დაავადების კლინიკური მიმდინარეობის სხვადასხვა ფორმა არსებობს. ის ვრცელდება მღრღნელებიდან და ინფიცირებუ­ლი რწყილებიდან, რის შედეგადაც სხვადასხვა კლინიკური ფორმა ვითარდება. ძირითადად გამოყოფენ ბუბონურ, სეპტიკურ და პულმონურ ფორმებს. ეს უკანასკნელი იშვიათი იყო. ბუნებრივი მიმდინარეობით პულმონური "შავი ჭირი" იშვიათად გვხვდებოდა, მაგრამ, როგორც ჩანს, ლაბორატორიულ შტამებს შეუძლიათ ასეთი ფორმის გამოწვევა.- როგორია პულმონური "შავი ჭირის" სიმპტომები და რამდენად სწრაფად შეიძლება გავრცელდეს ის ადამიანიდან ადამიანზე?- პულმონური "შავი ჭირის" მთავარი სიმპტომი და კლინიკური გამოვლინება რესპირატორული ტრაქტის დაზიანებაა. პირველ რიგში ზიანდება ფილტვები და იწვევს ძალიან მძიმე ორმხრივ პნევმონიას. მიმდინარეობს ფილტვის ქსოვილის დაზიანება. ამ დროს გამოხატულია ხველა, მკერდის არეში ტკივილი, ტუჩებისა და ცხვირის სილურჯე, მაღალი ცხელება და ინტოქ­სიკაცია. დაახლოებით 72 საათში შემთხვევა შეიძლება ლეტალურად დასრულდეს. თუმცა ამ ფორმის დროსაც, თუ სწრაფად მიიტანენ ეჭვს დაავადებაზე და დაიწყება ანტიბაქტერიული მკურნალობა, დიდი ალბათობით, პაციენტი გამოჯანმრთელდება. პულმონური ფორმა შეიძლება ადამიანიდან ადამიანზე გავრცელდეს. როდესაც ერთი პირი ინფიცირებულია და აწუხებს ხველა, ზედა სასუნთქი გზების დაზიანების შემთხვევაში წვეთოვანი გზით შეიძლება მეორე ადამიანი დაინფიცირდეს. მაგრამ თუ ვირუსული ინფექციებით ადამიანი შეიძლება 5-6 მეტრშიც დაინფიცირდეს, "შავი ჭირით" დაავადებისთვის აუცილებელია მჭიდრო, ინტენსიური კონტაქტი, დახურულ სივრცეში ყოფნა და ორ მეტრზე ნაკლები სიახლოვე.- ყირგიზეთმა, უზბეკეთმა და ყაზახეთმა საზღვრებზე უსაფრთხოების ზომები გააძლიერეს. ლიეტუვამ შესაძლოა რუსეთის მოქალაქეების ტრანზიტულად გადაადგილება აკრძალოს, თუ რუსეთში "შავი ჭირის" გავრცელების შესახებ ინფორმაცია დადასტურდება, აშშ კი ციმბი­რში პნევმონიური ჭირის სავარაუდო შემთხვე­ვის გამოვლ­ენის შემდეგ მოქალაქეებს რუსეთში გამგზავრებისგან თავის შეკავების­კენ მოუწოდებს, რა პოზიცია უნდა ჰქონდეს საქართველოს?შუა აზიის ქვეყნებს ინტენსიური მიმოსვლა აქვთ რუსეთის ფედერაციასთან და განსაკუთრებით იმ რეგიონთან, სადაც ეს დაავადება დაფიქსირდა. რეაგირებაც, ჩემი აზრით, ადეკვატურია. რაც შეეხება აშშ-სა და სხვა ქვეყნებს, რომლებიც შეშფოთებას გამოთქვამენ, ეს უფრო პრევენციული ხასიათისაა. საქმე გვაქვს მძიმე პათოგენთან და თადარიგს იჭერენ. რაც შეეხება საქართველოს, პირველ რიგში უნდა შესწავლილ იქნეს, არის თუ არა პირდაპირი მიმოსვლა იმ ქალაქებთან, სადაც ეს დაავადებაა დაფიქსირებული და კარანტინია გამოცხადებული; მეორე - უნდა მივყვეთ ჯანდაცვის მსოფლიო ორგანიზაციის მითითებებს. თუ გაიცემა რეკომენდაციები ჩვენი რეგიონის ქვეყნებისთვის, რა თქმა უნდა, მათი შესრულება საქართველომ სწრაფად უნდა დაიწყოს.წყარო: კვირის პალიტრა

იაშვილის სახელობის ბავშვთა ცენტრალური საავადმყოფოს სამედიცინო დირექტორის, პროფესორ ივანე ჩხაიძის ინფორმაციით, წელს საქართველოში დაახლოებით 200 ათასი დოზა უფასო, 100%-ით განახლებული გრიპის ვაქცინის შემოტანა იგეგმება, რომელიც 3-კომპონენტიანია და მოიცავს 2 „ა“ ტიპის (მისურის და დარვინის შტამები) და 1 „ბე“ ტიპის (ტოკიოს შტამი) კომპონენტს.როგორც ივანე ჩხაიძემ აღნიშნა, გრიპის აქტიურობის პიკს დეკემბრის ბოლოსა და იანვრის დასაწყისში უნდა ველოდოთ.„მოლოდინი გვაქვს, რომ წლევანდელი სეზონი იქნება იმ სტატისტიკის ფარგლებში, რაზეც მრავალწლიანი მონაცემები მიუთითებს. ნოემბერში დაიწყება გრიპის შემთხვევების მატება, ხოლო დეკემბრის ბოლო და იანვრის დასაწყისი შესაძლოა, იყოს გრიპის აქტიურობის პიკი.სტატისტიკის თანახმად, 2026 წლის სეზონი ნაკლებად აქტიურია გასული 2 წელთან შედარებით - ნაკლებია მიმართვიანობა პირველადი ჯანდაცვის რგოლში, ასევე შემცირებულია ჰოსპიტალიზაციის მაჩვენებელი.რაც შეეხება იმას, თუ რა ტიპის ვირუსები ცირკულირებს. თუ დაავადებათა კონტროლის ეროვნული ცენტრის სტატისტიკას დავეყრდნობით, ყველაზე მეტი წილი მოდის რინოვირუსზე, ლაბორატორიულად დადასტურებული შემთხვევების 60% რინოვირუსით არის განპირობებული. ეს ნიშნავს, რომ მიმართვიანობა ფოკუსირებულია პირველად ჯანდაცვაზე და არა სტაციონარზე. ასევე ფიქსირდება იმ ტიპის ვირუსების მომატებული რაოდენობა, რაც მსუბუქი და საშუალო მიმდინარეობის დაავადებას იწვევს. ეს არის - ე.წ. ძველი კორონავირუსი, პარაგრიპი, ადენოვირუსი. ბოლო კვირების განმავლობაში, სტაბილურად ფიქსირდება კორონავირუსის შემთხვევებიც.ერთადერთი ქვეყანა სადაც ფიქსირდება გრიპის ადრეული აფეთქება და გრიპის ვირუსის ადრეული დასაწყისი, ეს იაპონიაა. გრიპის ვირუსი აგვისტოში დაფიქსირდა, რაც იმაზე მიუთითებს, რომ მიმდინარე სეზონი იქ გამორჩეულია. ამას, არანაირი გავლენა არ გააჩნია საქართველოზე არც პროგნოზულად და არც რეალური ზემოქმედების თვალსაზრისით. რადგან ქვეყანაში გრიპის შემთხვევები არ არის მომატებული და არც მნიშვნელოვანი ზეგავლენის მოხდენა არ შეუძლია, მოლოდინი გვაქვს, რომ გრიპის სეზონი წელს სტანდარტულად იქნება ისეთივე, როგორიც წინა წლებში იყო. ჩვენთან, ნოემბრიდან იწყება გრიპის გავრცელება. ოქტომბრის ბოლოს, ნოემბრის დასაწყისი ითვლება ვაქცინაციის იდეალურ პერიოდად. განსაკუთრებით ეს ეხება ე.წ. რისკ ჯგუფებს ( 65 წლის და უფროსი ასაკის პირები, გულ-სისხლძარღვთა სისტემის მძიმე დაავადებები, 2 წლამდე ასაკის ბავშვები, სამედიცინო პერსონალი და სხვა პირები).როგორც წესი, ვაქცინა შემოდის ოქტომბრის თვეში და იგეგმება დაახლოებით 200 ათასი დოზა უფასო ვაქცინის შემოტანა, რაც ქვეყნისთვის სავსებით საკმარისია“, - აღნიშნა ივანე ჩხაიძემ.ამასთან, განმარტა, თუ რატომ არის საჭირო გრიპის ვაქცინა ყოველ წელს.„მოცირკულირე გრიპის შტამები ყოველ წელს განსხვავებულია. გასულ წელს „ბე“ ტიპის გრიპის ვირუსი სჭარბობდა, 2 წლის უკან „ა“ ტიპის. გრიპის ვაქცინა არ განაპირობებს 1-წლიან დაცვას. გრიპის ვაქცინას დაცვის უნარი 6-8 თვის განმავლობაში აქვს საუკეთესო შემთხვევაში. წელს, ვაქცინის შემადგენლობა 100%-ით განახლებულია. 3-კომპონენტიანი ვაქცინა ნიშნავს, რომ ჩვენ წელს გვექნება შესაძლებლობა მოსახლეობას შევთავაზოთ გრიპის საწინააღმდეგო დაცვა და ამ ვაქცინაში შევა 2 „ა“ ტიპის ვირუსის საწინააღმდეგო ვაქცინა და ერთი „ბე“ ტიპის ვირუსის საწინააღმდეგო ვაქცინა.ასევე უნდა აღინიშნოს, რომ გრიპის საწინააღმდეგო სეზონური ვაქცინის ძირითად კომპონენტებს წარმოადგენს „ა“ გრიპის მისურის შტამი, ა ტიპის დარვინის შტამი და ტოკიოს შტამი“, - აღნიშნა ივანე ჩხაიძემ.Ipn.ge

რუსი ჩინოვნიკები მალავენ ირკუტსკის რეგიონში ფილტვის ჭირის მასობრივ აფეთქებას, რომელმაც უკვე იმსხვერპლა ერთი ადამიანი და კარანტინში მოათავსა 189 ადამიანი, - ამის შესახებ The Sun წერს.აღსანიშნავია, რომ ირკუტსკის ოლქის გუბერნატორმა იგორ კობზევმა უარი თქვა ფილტვის ჭირის აფეთქების საჯაროდ განხილვაზე და მხოლოდ „საშიში ინფექციური დაავადების“ გავრცელება ახსენა, რეგიონში მასობრივი ღონისძიებები კი გააუქმა. ამასობაში, ირკუტსკის რეგიონში ანტიბიოტიკების მარაგი უკვე ამოიწურა, რადგან შეშინებულმა მოსახლეობამ აფთიაქებს მიაშურა.რუსული მედია იუწყება, რომ ირკუტსკის ჭირის საწინააღმდეგო კვლევითი ინსტიტუტის სპეციალისტი, 28 წლის დარია შიპილოვა, ფილტვის ჭირით გარდაიცვალა. წინასწარი ინფორმაციით, მას ეს დაავადება რუსეთსა და მონღოლეთს შორის საზღვარზე ექსპედიციის დროს დაუდგინდა, სადაც სწრაფად გავრცელებული ინფექციების შემთხვევები დადასტურდა.The Sun-ის ჟურნალისტებმა ასევე გაარკვიეს, რომ ირკუტსკის ოლქის ბაიკალსკის მცხოვრებლებს ოფიციალური განცხადებით ურჩიეს, თავი აერიდებინათ შელეხოვში მოგზაურობისგან, თუმცა ეს შეტყობინება მოგვიანებით წაიშალა.გამოცემამ დასძინა, რომ ვლადიმერ პუტინის ადმინისტრაციის მთავარი ინფექციური დაავადებების ექიმი, ანა პოპოვა სასწრაფოდ მოსკოვიდან ირკუტსკის რეგიონშიც კი ჩაფრინდა, რათა საგანგებო რეაგირება პირადად აეღო, თუმცა დუმილი შეინარჩუნა.წამყვანმა რუსმა ეპიდემიოლოგმა მიხაილ ფავოროვმა, რომელიც ამჟამად შეერთებულ შტატებში იმყოფება, ჟურნალისტებს განუცხადა, რომ პოპოვას პირადად ირკუტსკში ყოფნა ნიშნავს, რომ სიტუაცია „საშინელი და კრიტიკულია“. მან აღნიშნა, რომ ამჟამად ფაქტების ფართომასშტაბიანი დაფარვა მიმდინარეობს.ვრცლად unian.net - ზე

თბილისში ახალი, 259-საწოლიანი ფსიქიატრიული და ნარკოლოგიური საავადმყოფოს მშენებლობა და აღჭურვა იგეგმება. პროექტის ჯამური საინვესტიციო ბიუჯეტი 50 მლნ ლარს შეადგენს. ამის შესახებ ფინანსთა სამინისტროს მიერ მომზადებულ, 2027 წლის სახელმწიფო ბიუჯეტის პროექტის პირველად ვერსიაშია აღნიშნული.პროექტის განმახორციელებელია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო.ბიუჯეტის პროექტის მიხედვით, ფსიქიატრიული და ნარკოლოგიური საავადმყოფო თბილისში, სახელმწიფო საკუთრებაში არსებულ მიწის ნაკვეთზე აშენდება.დოკუმენტის თანახმად, პროექტის მიზანია არსებული ამორტიზებული ინფრასტრუქტურისა და საწოლფონდის დეფიციტის აღმოფხვრა, სამედიცინო სიმძლავრეების გაფართოება და ახალი, სპეციალიზებული, საერთაშორისო სტანდარტების შესაბამისი და უსაფრთხო სერვისების დანერგვა და მათი ხელმისაწვდომობის გაზრდა.ახალი ინფრასტრუქტურა ჯამში 259 საწოლს მოიცავს, მათ შორის 174 ფსიქიატრიულ და 85 ნარკოლოგიურ საწოლს.როგორც დოკუმენტში ვკითხულობთ, მრავალპროფილური სამედიცინო კომპლექსი გააერთიანებს ბავშვთა და მოზარდთა ფსიქიატრიას, დუალური დიაგნოზის მართვის, მოზრდილთა ფსიქიატრიულ და ნარკოლოგიურ განყოფილებებს, ამბულატორიას, ჩანაცვლებით თერაპიას, ლაბორატორიას, სარეაბილიტაციო, ადმინისტრაციულ და ტექნიკურ ბლოკებს.პროექტის ფარგლებში ასევე გათვალისწინებულია სქესის მიხედვით მკაცრად განცალკევებული და უსაფრთხო გარემოს შექმნა.პროექტის მოსალოდნელი შუალედური შედეგის მიხედვით, 2031 წლისთვის უნდა დასრულდეს ახალი, 259-საწოლიანი კლინიკის შენობის სამშენებლო-სამონტაჟო სამუშაოები, მისი თანამედროვე სამედიცინო ტექნოლოგიებითა და ინვენტარით სრულად აღჭურვა, მართვის გუნდის ჩამოყალიბება და 200 ახალი კვალიფიციური კადრის მობილიზება/მომზადება.დოკუმენტის თანახმად, 2027–2031 წლებში სამშენებლო სამუშაოებისთვის ყოველწლიურად 8 მლნ ლარია გათვალისწინებული, ჯამში 40 მლნ ლარი, ხოლო ტექნოლოგიური აღჭურვისთვის 2030 წელს 6 მლნ, 2031 წელს კი 4 მლნ ლარი გამოიყოფა.დოკუმენტის მიხედვით, კლინიკის სრული და გამართული ოპერირება 2031 წლიდან არის დაგეგმილი. ბიუჯეტის პროექტის მიხედვით, „შედეგად გაიზრდება ფსიქიკური ჯანმრთელობისა და ნარკოლოგიური სერვისების გეოგრაფიული და ფინანსური ხელმისაწვდომობა, აღმოიფხვრება ნარკოლოგიურ დეტოქსიკაციაზე ლოდინის რიგები და შემცირდება პაციენტთა ოჯახების მიერ „ჯიბიდან გადახდები“.ამასთან, პროექტის საბოლოო მიზნად კლინიკის სრული ფინანსური თვითკმარი ოპერირების უზრუნველყოფაა განსაზღვრული.ცნობისთვის, ამ ეტაპზე 2027 წლის სახელმწიფო ბიუჯეტის პროექტის პირველადი ვერსია გასაჯაროვდა. მის საბოლოო დამტკიცებამდე დოკუმენტში ცვლილებებისა და კორექტირებების შეტანაა შესაძლებელი.BPN

ფრინველის გრიპის H5N1-ის ვირუსი შესაძლოა მომავალში ახალი პანდემიის ერთ-ერთი შესაძლო მიზეზი გახდეს - ამაზე ყურადღებას საერთაშორისო ჯანდაცვის ორგანიზაციები ამახვილებენ. ვირუსი ბოლო წლებში ფართოდ გავრცელდა და ფრინველებთან ერთად ძუძუმწოვრებშიც, მათ შორის მსხვილფეხა პირუტყვშიც, დაფიქსირდა.ჯანდაცვის მსოფლიო ორგანიზაციის (WHO) ახალი შეფასებით, მაღალპათოგენური ფრინველის გრიპის ვირუსები მსოფლიოს სხვადასხვა რეგიონში ცირკულირებს და სულ უფრო მეტ ცხოველურ სახეობას აზიანებს. განსაკუთრებით საყურადღებოა აშშ-ში რძის მწარმოებელ პირუტყვში H5N1-ის გავრცელება, რასაც ადამიანების ინფიცირების შემთხვევებიც მოჰყვა.სხვადასხვა ქვეყნის მკვლევარი ამ ქვეტიპს  „დაავადება X“-ის ერთ-ერთ შესაძლო კანდიდატად განიხილავს. ანუ, H5N1-ის ერთ-ერთ ქვეტიპს იმ ვირუსებს შორის განიხილავენ, რომლებმაც შესაბამისი ცვლილებების შემთხვევაში შესაძლოა ფართომასშტაბიანი ეპიდემია გამოიწვიონ.საერთაშორისო ორგანიზაციები - WHO, გაეროს სურსათისა და სოფლის მეურნეობის ორგანიზაცია (FAO) და ცხოველთა ჯანმრთელობის მსოფლიო ორგანიზაცია (WOAH) - აცხადებენ, რომ ვირუსის ფართო გავრცელება საჭიროებს მუდმივ მონიტორინგს, რადგან მისი ადამიანებში გავრცელების შესაძლებლობა რჩება.თუმცა, ამ ეტაპზე ახალი პანდემიის დაწყების ნიშნები არ არსებობს. საერთაშორისო ორგანიზაციების ბოლო შეფასებით, H5 ვირუსებით გამოწვეული გლობალური საზოგადოებრივი ჯანმრთელობის რისკი დაბალია და H5N1-ის ადამიანიდან ადამიანზე მდგრადი გადაცემის მტკიცებულება ჯერ არ არსებობს.რისკის შეფასებისას ერთ-ერთი მთავარი საკითხი სწორედ ისაა - შეძლებს თუ არა ვირუსი მომავალში ადამიანებს შორის უფრო მარტივად გავრცელებას. ამიტომ მეცნიერები მის გენეტიკურ ცვლილებებსა და სხვადასხვა სახეობაში გავრცელებას მუდმივად აკვირდებიან.WHO-მ რამდენიმე დღის წინ, რეკომენდაცია გასცა H5N1-ის საწინააღმდეგო ვაქცინების კვლევისა და პანდემიური მზადყოფნის გაგრძელების შესახებს.WHO-ს მონაცემებით, 2026 წელს, 6 სექტემბრის მდგომარეობით, H5N1-ით ინფიცირების 10 შემთხვევა დაფიქსირდა, მათგან ორი პაციენტი გარდაიცვალა.

დიუშენის კუნთოვანი დისტროფიის მქონე ბავშვებისთვის სარეაბილიტაციო ცენტრი აშენდება, - ამის შესახებ დედაქალაქის მერმა კახა კალაძემ თბილისის მუნიციპალიტეტის მთავრობის სხდომაზე განაცხადა.როგორც მან აღნიშნა, სარეაბილიტაციო ცენტრის შესაქმნელად, მუნიციპალიტეტი გლდანის რაიონში მდებარე 1 657 კვადრატული მეტრის მიწის ნაკვეთს გადასცემს ორგანიზაციას „ერთად ვებრძოლოთ დიუშენის კუნთოვან დისტროფიას“.„დედაქალაქში დიუშენის კუნთოვანი დისტროფიის მქონე ბავშვებისთვის თანამედროვე სარეაბილიტაციო ცენტრი შეიქმნება. ცენტრალურმა ხელისუფლებამ, პრემიერ-მინისტრის ხელმძღვანელობით, მთელი რიგი გადაწყვეტილებები მიიღო. ამ პროცესში თბილისის მერიაც აქტიურად მონაწილეობს. დიუშენის კუნთოვანი დისტროფიის მქონე ბავშვების მშობლებთან არაერთი შეხვედრა გავმართეთ და არსებული საჭიროებები დეტალურად განვიხილეთ. სწორედ ამიტომ, მივიღეთ გადაწყვეტილება, რომ სარეაბილიტაციო ცენტრის შესაქმნელად, გლდანის რაიონში 1 657 კვადრატული მეტრის მიწის ნაკვეთი გადავცეთ ორგანიზაციას „ერთად ვებრძოლოთ დიუშენის კუნთოვან დისტროფიას“, - აღნიშნა კახა კალაძემ.მისივე თქმით, დიუშენის კუნთოვანი დისტროფიის მქონე ბავშვებისთვის მნიშვნელოვანია როგორც რეგულარული სამედიცინო-სარეაბილიტაციო ზრუნვა, ისე საზოგადოებრივ ცხოვრებაში აქტიური ჩართულობა.„ეს იქნება სივრცე, სადაც დიუშენის კუნთოვანი დისტროფიის მქონე ბავშვები შეძლებენ კომპლექსური სარეაბილიტაციო და საგანმანათლებლო მომსახურების მიღებას, რაც მნიშვნელოვნად შეუწყობს ხელს მათ სოციალიზაციასა და განვითარებას. დიუშენის კუნთოვანი დისტროფია იშვიათი გენეტიკური დაავადებაა, რომელიც კუნთების პროგრესირებად სისუსტეს იწვევს. ამ დაავადებასთან გამკლავება ყოველდღიურ, უწყვეტ ძალისხმევას მოითხოვს როგორც ბავშვების, ისე მათი ოჯახების მხრიდან. სწორედ ამიტომ, მათთვის მნიშვნელოვანია როგორც რეგულარული სამედიცინო-სარეაბილიტაციო ზრუნვა, ისე საზოგადოებრივ ცხოვრებაში აქტიური ჩართულობა“, - განაცხადა დედაქალაქის მერმა.

ძალიან ცხელმა ჩაიმ და ყავამ შესაძლოა მნიშვნელოვნად გაზარდოს საყლაპავის ბრტყელუჯრედოვანი კარცინომის განვითარების რისკი, – ამ დასკვნამდე მივიდნენ ოქსფორდის უნივერსიტეტის მეცნიერები დიდი ბრიტანეთის თითქმის 980 000 მოქალაქის მონაცემების ანალიზის შემდეგ. შედეგები გამოქვეყნდა International Journal of Cancer–ში.მკვლევრები მონაწილეებს დაახლოებით 14 წლის განმავლობაში აკვირდებოდნენ და იწერდნენ, თუ რამდენად ცხელი ურჩევნიათ მათ სასმელი. მათ, ვინც „ძალიან ცხელი“ სასმელები „თბილი“ სასმელების ნაცვლად აირჩია, საყლაპავის ბრტყელუჯრედოვანი კიბოს დაახლოებით სამჯერ მაღალი რისკი ჰქონდათ. თუმცა, დაავადების კიდევ ერთ გავრცელებულ ტიპთან, საყლაპავის ადენოკარცინომასთან კავშირი ვერ იქნა ნაპოვნი.სასმელების რაოდენობაც მნიშვნელოვანი ფაქტორი აღმოჩნდა. იმ ადამიანებს შორის, რომლებიც დღეში ექვს ან მეტ ცხელ სასმელს სვამდნენ, ბრტყელუჯრედოვანი კარცინომის რისკი 71%-ით მაღალი იყო, ვიდრე მათ შორის, ვინც ნაკლებს სვამდა. ავტორები ვარაუდობენ, რომ ძალიან მაღალმა ტემპერატურამ შეიძლება დააზიანოს საყლაპავის ლორწოვანი გარსის უჯრედები.კვლევა ადასტურებს აზიაში, აფრიკაში, სამხრეთ ამერიკასა და ახლო აღმოსავლეთში ჩატარებული უფრო ადრეული კვლევების დასკვნებს. ამ კვლევებში, ჩაის ან მატეს დაახლოებით 70°C და მეტი ტემპერატურის დალევა ასევე დაკავშირებული იყო საყლაპავის კიბოს განვითარების გაზრდილ რისკთან. 2016 წელს კიბოს კვლევის საერთაშორისო სააგენტომ ძალიან ცხელი სასმელები „ადამიანისთვის სავარაუდოდ კანცეროგენულ“ სასმელებად დააკვალიფიცირა.ამასთან, მეცნიერებმა სასმელების რეალური ტემპერატურა არ გაზომეს — მონაწილეებმა ის შეაფასეს, როგორც „ძალიან ცხელი“, „ცხელი“ ან „თბილი“. შესაბამისად, შედეგები არ იძლევა პირდაპირი მიზეზშედეგობრივი კავშირის დადგენის საშუალებას. მკვლევრები ასევე აღნიშნავენ, რომ ადამიანები შეიძლება სასმელების ტემპერატურას სხვადასხვაგვარად აღიქვამენ.დიდი ბრიტანეთის კიბოს კვლევის ცენტრი ურჩევს, არ თქვან უარი ჩაიზე ან ყავაზე, უბრალოდ, სასმელი კომფორტულ ტემპერატურამდე გაგრილდეს. დიდ ბრიტანეთში ბრტყელუჯრედოვანი საყლაპავის კიბოს შვიდი შემთხვევიდან დაახლოებით ერთის პრევენცია თეორიულად შესაძლებელი იქნებოდა, თუ „ძალიან ცხელი“ სასმელების მსმელები უფრო დაბალ ტემპერატურას აირჩევდნენ.წყარო: snob.ru

დიდი ბრიტანეთის ჯანდაცვის ეროვნული სამსახური (NHS) ლონდონის 100-ზე მეტ საოპერაციოში ხელოვნურ ინტელექტს (AI) დანერგავს. The Telegraph-ის ცნობით, აღნიშნული ინიციატივა სამედიცინო სექტორში ტექნოლოგიის დანერგვის ყველაზე მასშტაბური საპილოტე პროექტი იქნება.ხელოვნური ინტელექტი სპეციალური კამერების მეშვეობით თვალყურს ადევნებს საოპერაციოებში მიმდინარე პროცესებს და ეხმარება პერსონალს შეფერხებების, დროში აცდენებისა და იმ ხარვეზების გამოვლენაში, რაც საავადმყოფოებს საოპერაციო ბლოკების სრული დატვირთვით გამოყენებაში ხელს უშლის.NHS-ის მონაცემებით, სისტემას შეუძლია პროცედურის ხანგრძლივობა 6 კვირით ადრე იწინასწარმეტყველოს, გამოავლინოს აუთვისებელი ან გადატვირთული განრიგი და შესთავაზოს ოპტიმალური ცვლილებები. გარდა ამისა, სისტემა პერსონალს აფრთხილებს, შეიყვანონ შემდეგი პაციენტი საოპერაციოს დასუფთავებისა და მომზადებისთანავე.დეველოპერების ინფორმაციით, ორ NHS-ის ტრასტში ჩატარებულმა წინასწარმა ტესტირებამ ჩატარებული ოპერაციების რაოდენობის 8.2%-იანი ზრდა აჩვენა, რაც თითო საოპერაციოზე თვეში საშუალოდ 7 დამატებით პროცედურას ნიშნავს. 13 საოპერაციოს მქონე ჰოსპიტლის მასშტაბით ეს წლიურად დაახლოებით 1,000 დამატებით ოპერაციას უთანაბრდება.„ჩვენ ტექნოლოგიური რევოლუციის ზღვარზე ვართ. უნდა გამოვიყენოთ ხელოვნური ინტელექტის შესაძლებლობები, რათა დავეხმაროთ NHS-ს პაციენტთა მოვლის პროცესების გარდაქმნაში, ხოლო ადგილობრივ საავადმყოფოებს - პროდუქტიულობის ამაღლებაში“, - განუცხადა The Telegraph-ს NHS England-ის თავმჯდომარემ, დოქტორმა პენი დაშმა.ტექნოლოგია ბრიტანულმა კომპანია Proximie-მ შეიმუშავა. პროექტის ფარგლებში cloud-ინფრასტრუქტურას Amazon Web Services (AWS) უზრუნველყოფს, ხოლო საკონსულტაციო გიგანტი Deloitte საავადმყოფოებს მიღებული მონაცემების ყოველდღიურ მართვაში ინტეგრირებაში დაეხმარება.პაციენტთა პერსონალური მონაცემების დასაცავად, სისტემა ვიზუალურ მასალას უშუალოდ საოპერაციოშივე გარდაქმნის: გამოსახულებაზე სახეები იბურება, რის შემდეგაც AI მხოლოდ ანონიმიზებულ მონაცემებს (აღჭურვილობა, პერსონალის მოძრაობა და ოპერაციის ეტაპები) ამუშავებს.დღეისათვის ინგლისში NHS-ის მოლოდინის სია 7 მილიონ პაციენტს აჭარბებს. ჯანდაცვის სექტორის ლიდერები ვარაუდობენ, რომ AI ტექნოლოგიების დანერგვით შესაძლებელი გახდება არსებული რესურსების მაქსიმალური ოპტიმიზაცია და პაციენტთა ნაკადის მომსახურება დამატებითი ფინანსური თუ ინფრასტრუქტურული დანახარჯების გარეშე.gbc.ge